Shillong, Jymmang 03: U Superintendent ki pulit ka East Khasi Hills District la iathuh ba kila ioh ia ka jingpyntip ba saw ngut ki khynnah shynrang bad kynthei kila jah na Jorhat ka jylla Assam.
Halor kane ka jingpyntip ki pulit kila pynlong ia ka jingwad da ka kynhun jong ka Sadar Police Station bad ka Women Police Station bad ia kitei ki khynnah, la lap na J K. International Hotel , Police Bazar.
Kitei ki khynnah ki dei kiba la don 16 haduh 17 snem ka rta bad la lap lang ia uwei ruh uba ia don lang bad ki uba la don 26 snem ka rta. Ha ka por ba kylli ia ki kynthei ba jah rngai, la tip ba ki dei shi paralok bad kita ar ngut kiwei pat ki khynnah ki dei ki bakha.
Ki la poi ha ka 31/5/2026 bad kila wankai shane khlem da pyntip ia ki kmie ki kpa jong ki. Hynrei ha ka 2/6/2026 ka kynhun pulit na Jorhat ryngkat bad kiba ha iing ha sem jong kine ki khynnah ki la poi ha Sadar Police Station bad la aiti noh ha kiba ha iing jong ki.
