Shillong, Nailur 11: U Myntri Rangbah ka Jylla Conrad K Sangma ha ka sngi Palei ula pynlait paidbah ia ka prokram ban sam ia ki tiar sumar ia ki Kmie bad ki Khunlung ne ka Maternal bad Child Care Kit hapoh ka Mission 1000 sngi ka Sorkar Jylla ha ka jingialang ba long ha Rongara, ha South Garo Hills.
Ka Mission 1000 sngi ka shim ia ka rukom iaid ka jingim sha ka jingheh jingsan ki Khunlung, ka por naduh ba dang pun ha kpoh haduh ka jingdap 3 snem ka long kaba kongsan ia ka met ka phad ki khunling, ka bor ban lah ithuh, ban don jingsngew bad ka heh ka san ha ryngkat ka imlang sahlang.
Kane ka prokram ka thmu ban pynthikna ba ki Kmie bad ki Khunlung ki ioh ia ki jingsumar, jingkyrshan bad ki jingsngew thuh kiba donkam ha ka por kaba kongsan tam.
Kum shibynta jong ka prokram, yn sam ia ki tiar sumar ia ki Kmie bad Khunlung sha baroh ki Kmie kiba kha ia ki khun ha ki jaka sumar ka Sorkar hapoh ka Jylla. Kine ki tiar sumar ki kynthup ia ki tiar na ka bynta ka Kmie bad ki Khunlung, kynthup ka pla na ka bynta ka Kmie, ki jain na ka bynta ki Khunlung, ka blanker bad ki tiar sumar khunlung.
Man kine ki tiar kin don ia ka shithi na u Myntri Rangbah, ka ban batai ia ka jingkongsan ka jingheh jingsan ki khunlung naduh ba dang lung ka rta bad pynshlur ia ki kmie kpa ba kin ai ka jingsumar kaba biang, ka bam tei met, jingpynshlur bad jingpynheh pynsan kaba biang ha ki snem ba u khunlung u dang san.
Haba ai jingkren, u Myntri Rangbah ula ban jur ba ka jingkynshew ha ki Khunlung ha ka por ba ki dang lung ka rta ka dei ka jingkynshew ha ka lawei jong ka Meghalaya. Ka Mission 1000 sngi ka kwah ban pynkhlain ia ka jingpynsngewthuh bad kyrshan ia ki Kmie bad ka Iing ka se jong ki haba buh ia ka heh ka sain ki Khunlung hapdeng eh jong ka jingpyrshang ka Jyla ban tei ia ka lawei kaba koit ba khiah bad kaba lah ban leh shibun kiei kiei.
Kane ka prokram la khmih lynti ba kan pynmyntoi ia kumba 70,000 ngut ki Kmie ba armet bad ki Khunlung ha kylleng ka Jylla ha une u snem ba mynta.
