Shillong, Nailur 11: Ka tnad jong ka jingpule shaphang ka mariang, North-Eastern Hill University (NEHU), Shillong, kala pynlong iaka 17th Himalayan Day–2026 halor ka jingai da ka kyrteng “Ka jingkhluit ka mariang bad ki lum Himalaya.” Ha kane ka prokram, ka iadon lang ki nongtrei kane ka skul bah NEHU, samla pule, ki riewshemphang, ki nongiada iaka mariang bad kiba shah khot sngewbha ba kin batai bniah halor ka jingktah jingkylla ka suinbneng ha ki rukom long ki lum Himalaya kiba tlot bad ka jingdonkam na ka bynta ban pynneh bad sumar iaka mariang.
Ha katei ka prokram, la sdang da ka jingpdiang sngewbha bad jingpyn ithuh da u Prof. S. K. Barik, Vice-Chancellor, NEHU, uba la ban jur shaphang ka jingshah ktah ki lum Himalaya na ka daw jong ka jingkylla ka suinbneng bad u la iawer iaki paidbah ba kin long kiba shimkhia bad leh eiei halor kane.
U la pynkynmaw da kaba ong, “Ka sngi Lum Himalaya ka dei na ka bynta ban sumar iaki kynja ba im ba bun jait,” bad u la ong ba ka long kaba donkam ban sumar iaki kynja ba im ba bun jait bad pynthikna ba ka jingpyndonkam iaki khyndew ki thaw bad ki mar ryngkat ka mariang khlem da pynsniew iaki.
U Dr. S. Ashutosh, IFS, Former PCCF, Meghalaya and Co-Chairman & Director, Centre of Excellence (NRM & SL), MBDA, Meghalaya, u la ong ba lada don kano kano ka jingkylla ha ka mariang ne na ka jingleh u briew, ka lah ban ktah mationg bad pynjot kloi ia kane ka thain. La pynrem bad ban jur ruh halor ka jingdonkam ban pynkylla iaka jingtip ba kongsan bad bashai ka saian sha ka jingleh kaba biang bad kaba paka ban ri ban da bad ban pynlong iaki rukom treikam kiba paka.
Ha katei ka prokram, la don lang ki riewshemphang ba tbit kiba la pyni iaki kam ba ki trei, kynthup ia u Prof. S. R. Joshi, NEHU, halor ka “Ka jingdonkam jong ki khniang barit ha ki kyndon ka jingkylla ka mariang”; u Dr. Anil Prakash Joshi, uba la iohpdiang iaka khusnam Padma Bhushan bad Padma Shri na Uttarakhand; u Prof. V. P. Sati, Dean, School of Earth Sciences & NRM, Mizoram University bad u Dr. Rajesh Joshi, Head, GBPNIHE–Sikkim Regional Centre.
Kine ki riewshemphang kila kren shaphang ka jingkylla ka suinbneng, ka jinghiar kaba khah khah jong ka khyndew kaba la tynsah da u thah, ka jingpynbor kaba mih na ki kam u briew, ka jinglah ka bor ban ieng skhem bad pynbeit thymmai ka mariang, ka jingpynkhreh ia kino kino ki jingjia lynshop mariang bad ka jingdonkam bad ka jingiatreilang ki paidbah ka thain ne shnong kum ka hima, kur bad dorbar shnong ba kin ia mir jingmut lang ha kaban sumar bad iada iaka mariang.
Ka jingialang kaba don rynsan bad iatai nia kala ai ka lad kaba kongsan iaki khynnah sku, ki nonghikai bad ki riewshemphang ban iapan rynsan bad ban iathir iaki jingshem halor ka jingkylla ka suinbneng, ka jingiada iaki jingthaw ba nylla, ka jingpynkhreh na ka bynta ki jingwan lynshop ka mariang, ka jingroi jingsan kaba neh bad ka rukom tyngkai iaka mariang. Ka jingiakren hangne ka long ka jing ban jur halor ki lad ban iada iaka mariang, jingpeit bniah da ka buit saian bad kiwei kiwei na ka bynta ka jingpynbeit bad ka jingiada iaka mariang ha ki jaka ba don u Lum Himalaya.
La pynkut ia katei ka prokram da ka Himalayan Day Pledge, da u Prof. P. K. Patra, In-charge Vice-Chancellor, NEHU, lem bad ki nongiashim bynta kiba la mynjur ban iada, pynneh iaka mariang jong u Lum Himalaya. La ai khublei da u Dr. Rajesh Bajpai, Head, Department of Environmental Studies, NEHU.
