Shillong, Nailur 19: Ka Rozgar Mela kaba 20 ka dei kaba la pynlong mynta ka sngi ha 45 tylli ki jaka ha kylleng ka ri, ba kynthup ruh ia ka Shillong, ha kaba la sam palat 51,000 tylli ki shithi thung kam sha ki samla ba dang shui oh kam sorkar bapher bapher. Ha kane ka bynta baroh kiba la ioh jingmyntoi hapoh ki Rozgar Mela ki la poi sha kumba 12.75 lak.
Ha Shillong, ïa kane ka prokram la pynlong ha State Convention Centre, ha kaba u Myntri Khynnah ka Sorkar Pdeng ba dei khmih ïa ki kam bar ri bad kam jaiñ, u Pabitra Margherita u la don lang. U Myntri Rangbahduh ka ri u Narendra Modi u la ai jingkren sha ki samla ba dang shu ioh kam lyngba ka video conferencing ha kane ka prokram.
Ha kane ka prokram la ai shithi thung kam ia haduh 127 ngut ha nongbah Shillong. Kitei kiba dang shu thung kam thymmai kin leit ban sdang trei ha ki tnad bad ki kynhun sorkar bapher bapher, kynthup ïa ka tnad Income Tax, Indian Railways, India Post bad kiwei kiwei.
U Pabitra Margherita haba ai jingkren ha kane ka jingialang u la ai khublei ia kitei ki samla kiba dang shu shimti thymmai ia ka kam bad kiba haiing hasem jong ki. U la ong ba ki shithi thung kam kim dei tang ka jingsdang jong ka kam hynrei kadei ka jingsdang jong ka jingleit shakri, ka jingkitkhlieh bad ka jingtei ia ka ri.
U la pynpaw ia ka bor kaba khraw jong ka thain shatei lammihngi bad ong ba ka jingpynbha ia ka jingpyniasoh bad ki jingtei ki wanrah ia ka jinglong ha kaba ki samla ki lah ban pule, trei, thaw jingmut bad tei ia ka lawei jong ki hapoh ka thain.
U Myntri u la ban jur ba ka roi ka par jong ka thaiñ Shatei Lammihngi ka long kaba kongsan eh na ka bynta ka roi ka par jong ka ri bad u la kyntu ïa ki samla kiba dang shu thung kam thymmai ba kin noh synniang sha ka lawei jong ka ri India da ka jingaiti lut, ka jinglong ba janai bad ka jingngeit skhem ha ka jingai jingshakri ia ki paidbah.
U Myntri Rangbahduh ka ri u Narendra Modi u la ai khublei ïa ki samla ba ioh kam thymmai bad kiba haïing hasem jong ki, da kaba kubur ïa ka jingtrei shitom jong ki samla bad ka jingaiti jong ki kmie ki kpa jong ki. U la ong ba ki samla kiba rung sha ka kam sorkar ki don ka bynta kaba kongsan ban pynurlong ia ka jingthmu jong ka Viksit Bharat shuwa ia u snem 2047.
U Myntri Rangbah duh u la kyntu ïa ki nongioh kam thymmai ba kin shim ïa ki rai kiba pynkhlaiñ ïa ka Viksit Bharat bad ka Atmanirbhar Bharat, da kaba buh ïa ki nongshong shnong bad ki jingangnud jong ki kum ka phang pdeng jong ka kam jong ki. U la ban jur ba man la ka rai jong ka sorkar kadei ban iarap ban weng ia ki jingkhanglad bad ban thaw lad ia ki nongshong shnong.
Da kaba kdew ïa ka jingroi jong ka India ha ka liang ka jingioh kam bad ka jingseng kam seng jam, u Myntri Rangbahduh ka ri u la kdew ïa ka jingpynheh ïa ka rukom seng kam seng jam jong ka ri, khamtam ha ki nongbah Tier-2 bad Tier-3, bad ka jingkiew ka jingïashim bynta jong ki kynthei bad ki samla ha ka seng kam seng jam. U la pynpaw ruh ia ki jingthmu kiba iadei bad ka jingkyntiew ia ki sap, ki jinghikai ia ki kam bad ka jingpynmih kam.
U Myntri Rangbahduh u la ban jur ia ka jingdonkam jong ki rukom thung kam kiba shai bad kiba lah ban ioh bynta, kynthup ia ki eksamin ha ki ktien ba pyndonkam ha ki thain bad ki lad ki lynti kum ka jingjied ia ki jaka ban leit thoh eksamin. U la kdew ruh ia ka Mission Karmayogi, da kaba ong ba lyngba kane, palat 1.72 klur ngut ki nongpyndonkam ki la pynrung kyrteng na ka bynta ka jingpule kaba bteng bad ban kyntiew ia ka bor treikam.
Da kaba ban jur halor ka jingsynshar kaba pynshong nongrim ha ki nongshong shnong, u Myntri Rangbahduh u la kyntu ia ki nongtrei ba ioh kam thymmai ba kin iai kyntiew ia la ka sap treikam bad ban sngewthuh ia ki buit bad ki rukom treikam kiba thymmai. U la ong ba ka bor ba shisha jong ka sorkar ka shong ha ka jingshaniah jong ki nongshong shnong.
U Myntri Rangbahduh jong ka ri u la kyntu ïa ki nongtrei ba dang shu thung thymmai ba kin bud ryntih ïa ka nongrim “Nagarik Devo Bhava”, bad u la ong ba ka jingshakri ïa ki nongshong shnong ka dei ka jingshakri ïa ka ri. U la pynpaw ia ka jingngeit skhem jong u ba ki nongtrei ba ioh kam thymmai kin pyndep ia la ka kamram da ka jingaiti lut, ka jingsngewrit, ka jingtbit bad ka jinglong kaba hok.
Ia kane ka prokram la pynlong da ka Ophis jong u Chief Commissioner ka Income Tax, Shillong. Ha kane ka sngi la iadonlang u Darzakhum Songate uba long u Chief Commissioner jong ka Tnad Income Tax, Shillong; Ka Ningreirum Longvah kaba dei ka Principal Chief Commissioner jong ka Tnad Income Tax jong ka thain shatei lammihngi; bad u K. Meghanath Chowhan, Principal Commissioner jong ka Tnad Income Tax, Shillong, ha ryngkat ki samla ba dang shu thung kam thymmai bad ki ophisar na ki Tnad treikam bapher bapher.
