Shillong, Nailur 19: Ka Yonex Sunrise North East Zone Inter-State Badminton Championship 2026 kaba la poi sha kaba kut ha kaba ka jylla Assam kala wanrah burom da ka jingjop ha ka jingiakhun jong ka ha Jawaharlal Nehru Indoor Stadium.
Katba ka Assam kala jop haduh san sien ha ka jingialehkai marwei ha ka phainal, lem bad ka jylla Mizoram bad Manipur kiba la jo par sien bad ka Arunachal Pradesh shisien. Ha ka sngi Palei, ka Assam kala rah iaka nam jop napdeng baroh ka kynhun ialehkai ha ka men’s, women’s, U-19 boys’ bad U-19 girls’.
Ia katei ka jingialehkai ba neh saw sngi, la pyniaid da ka Meghalaya State Badminton Association (MSBA) ryngkat ka jingkyrshan jong ka Directorate of Sports and Youth Affairs kaba hap hapoh ka Badminton Association of India.
Katba ki nongshah khot sngewbha ha katei ka sngi ba khang ia katei ka jingialehkai, ki long ka Director General of Police jong ka jylla Meghalaya, ka kong Idashisha Nongrang IPS, kaba la sngewtynnad ban peit iaka jingialehkai ki men’s doubles final.
Ha ka jingkren jong ka, kala ai khublei ia baroh ki nongioh medal bad ruh ia kiba khlem ioh medal. Kala ong ba ka jingialehkai Badminton ka long ka jaka ba kongsan jong ki samla naba ka donkam iaka jingstet bad ka bor. Ka long kaei kaei kaba pynshlur ban iohi iaki nongialehkai ba don sap ba ki dei na kane ka thain lam mihngi, bynrap ka kong Nongrang.
La sdang ia katei ka jingialehkai da ka U-19 girls’ singles final ha kaba ka Gargi Saikia kala jop iaka nongiakhun pyrshah iaka, kaba na Assam, ka Noimikha Saikhia da 15-3, 15-9. Kumjuh, ha ka boys’ singles final, la iakhun hapdeng ki ar ngut ki nongtied Badminton na ka jylla Assam, ha kaba u Prangan Choudhury u la pynrem ia u Arnav Protim Borgohain 15-9, 15-10.
Katba kiwei pat ki U-19 finals, la jop da ki nongtied Badminton na kiwei pat ki jylla. Ha ka boys’ doubles, la khur jingjop da u Manku Taku bad u Gyurmey Tseten ha kaba kila iohrah mar uwei u medal na Arunachal Pradesh. Kila ioh pynrem ia u Malsawmhlua bad u Vanlalhruaia Sailo kiba na Mizoram da 15-7, 10-15, 16-14.
Haka girls’ doubles, la don ka jingiakhun hapdeng ka Lalrinhlui Hmar bad ka Zoramthari Renthlei na Mizoram da 15-13, 13-15, pyrshah iaka Avikaa Borgohain bad ka Bhavishya Changmai na Assam da 15-8.
Ha ka mixed doubles, u Vanlalpekhlua bad ka Lalrinhlui Hmar kila long ki nongjop ha kane ka jingialehkai da 16-14, 15-11 pyrshah ia u Truman Kalo bad ka Konsam Gunjan na Manipur.
Ha ka jingialehkai ki rangbah, u M Hemam bad ka P Konjengbam jong ka Manipur ki dei ki nongjop jong ka thup mixed doubles pyrshah ia u Swarnaraj Bora bad ka Bhavishya Changmai na Assam da 15-10, 12-15, 15-8.
Ha ka jingsam iaki khusnam kiba la ioh iaki medal ki kynthup iaki nongtied Badminton na ka jylla Meghalaya. Kiba la iohrah haduh saw tylli ki rnong hynnin ka sngi ki long ka Elsarica Umdor (women’s singles), Netania T Tariang (girls’ singles), Netania bad u Gavin Kharbuki (U-19 mixed doubles) bad u Gitchiak Bregim A Sangma bad ka Sonnal Joshi (senior mixed doubles).
Kane ka long shisha ka jingjop jong ki nongjop na ka bynta ka jingtrei shitom jong ki ba kila pynkhreh ha ki bnai ba la dep na ka bynta kane ka jingialehkai kumjuh ruh kin pynkhreh sa la shem snem na ka bynta ka 39th National Games, ha kaba ka jylla Meghalaya kan sa ioh pyniaid.
