Shillong,Rymphang,18: U DR Mukul Sangma u myntri rangbah ka jylla ha ka jing kren jong u, ha ka jingialap elekshion MDC hapoh ka Mawphlang Diengiei konsitwensi kaba la long ha ka shnong Mawngap u la ong ba ka sorkar ka shim khia ha kaba ia dei bad ka jingwan rung kyrthep ki briew kiba na bar.
Na ka liang jong ka sorkar ka la shim bun ki lad ki lynti kumno ban iada bad ki don kiba ain kiba ka dang peit bniah mynta bad ban dang pynbha shuh shuh ia ki. Ka sorkar ka la shim khia ha kane ka bynta.
Haba ia dei bad ka jingiakajia pud bad ka jylla Assam u myntri rangbah u la ong ba ka sorkar mynta ka la dep ban pynbiang ia ki kot ki sla baroh bad kala don ka committee kaba kyrpang kaba peit ia kane ka kam ha ka kyrdan Chief Secretary jong kine ki ar tylli ki jylla.
Na ka liang jong ka iing dorbar ka la dep ban pass ia ka rai bad la phah sha ka sorkar pdeng ba kan tuklar lem ia kane ka kam bad na ka liang jong ka jylla Assam ruh kala leh kum juh.
Na ka liang jong u myntri rangbah mynta ka sngi u la kyntu ia ki paidbah jong ka Mawphlang Diengiei Konstiturency ba kin ai biang ia ka jingkyrshah ia ka seng Congress da kaba pynjop ia u Bah Lamphrang Blah bad u la ong ba lada u bah Blah un wan biang kum u MDC kane ka jaka yn sa peit kyrpang na ka bynta kane ka constieuncy.
Kiwei kiba la kren ki long u Bah Kenendy Khyriem MLA jong kane ka jaka bad u Bah Blah u ba dei u MDC. Ha ka jingkren jong u Bah Blah u la ong ba ha kine ki snem kiba la leit kum u MDC kane ka jaka u la ia leh katba lah ban trei katkum la ka bor kaba u don.
U la ong ba lada ki don kino kino ki jingduna kiba u paidbah u shem kim dei bania thew ia woh bad lyngba kine ki jingduna u la ong ba u kloi ban trei kham bha bad u da kyrpad ba kin sngewbha ban jied biang ia u kum u MDC jong ki ha kane ka kynti kaba mynta.(SP News)
