Nongstoin, Oct 03: Ka Inquiry Committee kala don ka jingthmu ban kylli halor ki jingshah kynnoh kiba iadei bad ka jingthep kam jong ki Nurse ha MCH Hospital, Nongstoin, ha kaba kala khot iaki katto katne ki nongshah khot interview kiba la shah jied ba kin wan shakhmat ban ai da ka jingthoh lane phah da ka jingujor haba iadei bad kano kano ka jingbym biang ki jingkynnoh ha kane ka rukom thep kam.
Kane ka ar dkhot jong ka kynhun Inquiry Committee, kaba kynthup ia u Executive Magistrate bad u Superintendent of Police, West Khasi Hills District, kala peit thuh ia kine ki jingshah kynnoh ki bym dei, ka jingbam pisa, ka jingdawa pisa bad kiwei kiwei kiba iadei bad ka jingjied iaki nongshah khot interview.
Katba kino kino ki kandidet kiba la ngat ha kum kine ki jingshah pan pisa, jingshah dawa pisa bad kiwei kiwei mynshuwa, ha ka por lane ba la dep interview kin hap ban ai jingthoh sha ka Inquiry Committee, ai da ka jingujor da kaba shu thoh lane ka sakhi ba biang, kynthup da ki jingring dur lane iakren lyngba ka phone, ki message bad baroh kiba iadei bad ka jingphah pisa, katba don.
Ia ki jingthoh ba la dep rekod, yn sa pynlong naduh ka 5 haduh 9 tarik Risaw 2026, hapdeng ka por 10:00 baje mynstep bad 4:00 baje janmiet, ha ka kamra No. 108, jong ka ophis u Deputy Commissioner, West Khasi Hills District, Nongstoin.
Ka Inquiry Committee kala kular ruh ban nym iathuh ne pynpaw iaki kyrteng jong ki kandidet kiba ai iaki sakhi na ka bynta ban iada iaki na kano kano ka jingjia ba sngewsih bad kiwei kiwei.
Ki kandidet kiba kloi ban wan shakhmat kila shah kyrpad ban iarap iaka Inquiry Committee khnang ban iaid beit iaid ryntih kane ka rukom thung kam bad ia kane, la pyllait paidbah da ka Inquiry Committee.
