Shillong, Risaw 05: Ka Khasi Students’ Union (KSU) Central Executive Council, ka pynrem jur ia ki pulit jong ka East Khasi Hills District ha kaba kila kynnoh ba kala don ka jinglum pisa be-aiñ na ki trok wat kiba kit marbam-mardih ha Mawkhanu, Diengpasoh bad Thangshalai, East Khasi Hills District.
Ka KSU ka la ioh pdiang la bunsien ïa ki jingujor na ki Truck Associations, ki nongñiah trok bad na ki paidbah halor ka jingkynnoh ba ki pulit ki lum pisa be-aiñ na ki trok ha kine ki bynta jong ka surok. Hynrei, namar ka jingsheptieng ïa ka jingthombor ne jingpynshitom na ki pulit, bun na kito kiba shah ktah kim shym la nud ban ujor da kaba mudui beit iaki ejahar.
Watla katta, ka KSU ka la iohi ïa kiba bun ki jingkynnoh kiba la paw lyngba ki social media bad ki lad pathai khubor ha ki bnai ba la dep ha kaba ki pulit ki pyrshang ban leh men leh ban tohkit ki kot ki sla hynrei pynban ki pan da ka pisa kaba kot sha ka 200 haduh 500 kawei ka trok kaba kit kano kano ka mar ruh.
Ka jingbym shimkhia jong ki bor pulit, ka District Administration bad ka Sorkar Jylla ban pynbeit ïa kine ki jingkynnoh ka la pynbor ïa ka seng ban shim ïa ka sienjam ban shem ïa ka jingshisha.
Kumta ha ka 30 tarik Nailur 2026, hapdeng ka por 3 baje janmiet haduh 5 baje janmiet, ki dkhot ka KSU hapoh ka jingialam jong Bah Alerick Kharjana, Education Secretary, KSU CEC, ki la pynlong ïa ka operation ha ki jaka Mawkhanu bad Thangshalai ban lum ïa ki sakhi halor kine ki jingkynnoh.
Ha ka por ba ka seng ka la ap bad peitngor, la kumba shi kynta, ka KSU ka la lum ïa ki dur-video kiba pyni ïa kumba 30 haduh 40 tylli ki trok ha kine ki ar tylli ki jaka.
Ka KSU kala kam ba katkum ka jinglap jong ka seng, ki nongñiah trok ne ki handyman ki ju pynsangeh ïa ki trok hajan ki iing trep ba don ki pulit, ki hiar na ki kali bad leit sha kine ki jaka bad, la ai pisa kaba naduh 200 haduh 500 sha ki pulit shuwa ban ki pulit kin shah ïa ki ban iaid biang.
Ka seng ka la lum ruh ïa ki jingtip bad ki jingbatai na ki katto katne ki nongñiah trok kiba la kynnoh ba ki hap ban siew ïa kane ka pisa, namar lada kim siew, ki lah ban shah pynshitom, shah lehbeiñ bad ha katto katne ki jingjia, ki la kynnoh ruh ïa ka jingshah tied ne shah thombor.
Hadien ba ka seng ka la lum ïa ki sakhi, ki dkhot ka KSU ki la leit ban kynduh bad kylli ïa ki pulit kiba don ha kine ki iing trep. Ha kawei na ki iing trep ha Mawkhanu, Diengpasoh, ka seng ka lap ba uwei na ki pulit uba rah ïa ka pla, kaba ka seng ka suba ba ka lah ban don ka pisa kaba la lum be-aiñ, u la phet na katei ka jaka ynda ki dkhot ka seng ki poi ha katei ka jaka bad dang ring video.
Ha kawei pat ka jaka ha Thangshalai, ka seng ka kynnoh ba ki pulit ki la buhrieh ïa ka pisa. Namar ki dkhot ka seng kim dei ki briew kiba don ka bor katkum ka aiñ ban pynlong ïa ka body search, ka seng kam shym la bteng ban wad ïa ka met jong utei u pulit.
Kaba kham kongsan, ha ka por ba ki dkhot ka seng ki kylli ïa ki pulit, ki pulit ki la kynnoh ba ki jingbthah ban lum ïa ka pisa ki wan na ki bor kiba halor bad ba ki jingbthah kila poi lyngba ki Officer-in-Charge jong ka Mawryngkneng Police Station bad In-charge jong ka Diengpasoh Outpost.
Ka seng ka la dawa ïa ki pulit ba kin khot ïa u OC ban wan sha katei ka jaka. Watla u OC la phone, u khlem wan sha katei ka jaka. Kine ki jingjia ki pynmih ïa ka jingkylli kaba khraw ba hato kine ki dei tang ki kam jong ki katto katne ki constable, ne ka dei ka rukom treikam kaba la pynbeit bad synshar da ki bor kiba halor.
Kumta Ka KSU ka buh ïa ka jingkylli ba kumno ka jinglum pisa kaba la kynnoh ba ka jia man ka sngi, ha ki jaka kiba paw paidbah, kan jia khlem da tip ki heh ki bor pulit, Ka rukom ba ki trok ki sangeh ha ki jaka ba la tip lypa, ki nongñiah ki hiar bad leit sha kine ki iing trep ban ai pisa, lada la pynshisha, ka pyni ba kane ka lah ban long ka rukom kaba la pynbeit lypa bad kaba la bteng man ka por.
Namarkata, ka jingkitkhlieh kam lah ban hap tang ha ki constable kiba rit kyrdan. Ka KSU ka pynpaw ba u Superintendent of Police, East Khasi Hills District, Bah Vivek Syiem, um lah ban shu pynpaw ba um tip eiei lada ka long shisha ba kane ka rukom lum pisa ka la jia hapoh ka jurisdiction jong u.
Lada u SP u ong ba um shym la tip ïa kane ka jingjia, ka jingkylli ka mih, hato u la pyndep bha ïa ka jingpyniaid bad jingpeitngor ïa ki pulit kiba hapoh ka jingpyniaid jong u.
Hynrei lada la lap ba ki heh pulit ki tip bad ki la jied ban sngap jar, ka kam ka kham jur bad ka dei ban don ka jingtohkit kaba laitluid, kaba kynthup ruh ïa ka jingtohkit halor ka jingkitkhlieh jong ki heh bad kiba don halor.
Ka KSU ka pynkynmaw ruh ba ha ka 18 tarik Jylliew 2026, la mih ka video report lyngba ki lad pathai khubor/social media kaba la pyni ïa ka jingkynnoh ba ki pulit ki lum pisa na ki nongñiah trok. Watla kane ka mat ka la paw paidbah, ka seng kam tip ïa kano kano ka sienjam kaba shai kaba la shim da ki pulit, ka District Administration Lane ka Sorkar Jylla ha katei ka por.
Lada kine ki kam jaboh ki pulit ki la paw naduh Jylliew bad hadien kata ki kam kiba kumjuh ki dang iai bteng haduh Nailur, ka jingkylli ka long hato ki bor ba dei peit kim lah ban pynsangeh, ne kim kwah ban pynsangeh ïa kane ka rukom.
Ka seng ka buh ruh ïa ka jingkylli ba lada ki don ki jingkynnoh ba ka don ka rukom lum pisa be-aiñ kaba la pynbeit, ka jinglong slem jong ki officer bad personnel ha ki jaka kiba kum kine ka dei ban shah tohkit naduh U SP ka district haduh u Constable
Ka Sorkar ka dei ruh ban tohkit la ka don ne em kawei ka rukom treikam kaba la pynbiang lad ïa kiba don bynta ban ioh bynta na ka pisa kaba la lum. Kaba pynkhuslai shuh shuh ïa ka seng ka dei ka sienjam kaba la shim hadien ka operation jong ka seng ha ka 30 tarik Nailur 2026.
Ka seng ka kynnoh ba hadien ba ka KSU ka la pynpaw ïa kane ka mat, kine ki iing trep ha kine ki jaka ki la shah pynpra bad lada kine ki iing trep ki dei ki jaka kiba lah ban don bynta bad ka jingkynnoh lum pisa, ka jingpynpra ïa ki ka pynmih ïa ka jingartatien kaba jur halor ka jingpynneh ïa ki sakhi. Ha ka jaka ban pynneh ïa ki jaka bad ban ailad ïa ka jingtohkit laitluid ban peit bad lum ïa ki sakhi, la pynpra ïa kine ki iing.
Ka KSU ka iohi ruh ba la shim tang ki sienjam pyrshah ïa katto katne ki constable, katba ïa u Officer-in-Charge la pynkynriah. Ka seng ka pynpaw ba kane kam biang,bad lada ka don ka rukom lum pisa kaba la pyniaid da kawei ka kynhun, tang ban pynshitom ïa ki pulit rit kyrdan ka lah ban pynlong ïa ki kum ki langknia, katba kiba lah ban donkti ban ai jingbit, pynsah, pyniaid, pynshngaiñ ne ioh bynta na kane ka kam ki lait.
Namarkata, ka KSU ka dawa ïa ka jingtohkit kaba kynthup ïa ka baroh kawei ka kynhun ym tang ïa ki pulit rit kyrdan kiba la shah kynnoh. Ka KSU ka kwah ruh ban pynkynmaw ïa ka jingjia hadien ka Black Flag Bike Rally jong ka 19 tarik Nailar 2026.
Ka seng ka ban biang bad la pynshai bunsien ba ki don ki briew kiba ym dei bynta jong ka seng kiba la rung bad pynmih ïa ki kam pynjulor bad jingïakynad, bad ka KSU ka la kyntait ïa kano kano ka jingdon bynta ha kine ki kam.
Hynrei watla katta, u President, Vice-President bad General Secretary jong ka KSU ki la shah kem bad shah pynngat ha ki mukotduma, bad kawei na ki jingdawa ne jingmut jong ki pulit ka long ba ki nongialam kim lah ban pynjngai ialade na kano kano ka kam be-aiñ kaba jia hapoh ka lama jong ka kynhun kaba ki ialam.
Mynta ka KSU ka buh ïa ka jingkylli, lada kane ka nongrim ka dei ka nongrim jong ka aiñ, balei yn ailad ïa u Superintendent of Police ban pynjngai ialade na ki kam be-aiñ kiba la kynnoh ba ki pulit hapoh ka jingpyniaid bad jurisdiction jong u ki la leh, da kaba shu ong ba u khlem tip.
Lada u nongialam jong ka seng u hap ban kitkhlieh na ka bynta baroh ki kam be-aiñ kiba la kynnoh ba ki la jia hapoh ka lama jong ka seng, kumjuh ruh u heh pulit u dei ban kitkhlieh na ka bynta ki kam kiba jia hapoh ka tnat bad hapoh ka jingpeit jong u. Ka nongrim jong ka aiñ ka dei ban long kajuh ïa baroh.
Kumta ka seng ka dawa ban suspend mardor ïa u Superintendent of Police, East Khasi Hills District, Bah Vivek Syiem, na ka kam jong u haduh ban da dep ka jingtohkit laitluid, khnang ban lait na ka jinglah ban pynjot ne pynkylla ïa ki sakhi, ban ktah ïa ki sakhi-kylla ne ban pyntieng ïa ki pulit kiba lah ban don jingtip shaphang kane ka jingjia.
Ka KSU ka dawa ruh ba dei ban sdang ïa ka departmental proceeding pyrshah ïa u bad lada ka jingtohkit ka pynshisha ba u don bynta ne donkti, dei ban pynlong ïa ki criminal proceedings katkum ka aiñ bad ruh ban pynhiar kyrdan ia u na ka kam SP (Demote) katkum ka ain. Ka seng ka dawa ruh ban suspend ïa u Deputy Commissioner, East Khasi Hills District, ban pynthikna ïa ka jingtohkit kaba laitluid.
Ka Sorkar ka dei ban seng ïa ka Independent Investigation Mechanism, kaba laitluid pura na ka jingpyniaid ne jingktah jong ka Meghalaya Police, khnang ban tohkit ïa ka jingkynnoh lum pisa be-aiñ, ban lap ïa baroh kiba donkti.
Ka seng kan ym sngap jar haba ki briew kiba la bynshet ban pyntreikam ïa ka aiñ ki pynkheiñ ïa ka aiñ, kane ka long katkum ka kyrwoh kaba la phah da u samla Pynshaiborlang Rani Assistant General Secretary KSU CEC.
