Shillong, Risaw 05: Mynta ka sngi 5/Risaw/2026 ka seng samla pule Jaintia Student’s Union kala phah ia ka jingthoh sha u Superintendent ki Pulit ka West Jaintia Hills District ban kyrpad ia u ban tuklar lem namar ka jing jubor ka jingsahkut kali ha Iaw Musiang.
Ha kane ka shithi u President ka JSU Jowai Circle u Bom Rupon u la kdew ba ka jingdheng kali ne ka jingsahkut kali ka long ha ka jaka ieng Sumo ka barim hajan Police Point ha lynti Jowai- Shillong bad kane kala ktah ia ka jingsahkut ki kali ha Iaw Musiang.
La kdew ruh ba ka jingieng ki kali harud surok hajan ka jaka ieng Sumo barim kala pynwit ia ka leit ka wan jong ki kali khamtam ha ka por skul mynstep ban rung sha Iaw Musiang bad kane ka buh jingeh khamtam haba donkam kyrkieh ban kit ia kiba pang ba shitom.
Ka JSU kala kdew ba na ka liang ki pulit pyniaid kali kila leh la ka bynta ban pyniaid beit iaid ryntih ia ki kali hynrei ka jing bym don ia ki jaka ba la mang kyrpang ban kiew bad hiar kali kane ka buh ha ka jingeh bad kan long kaba bha lada ka sorkar kan shna ia ki jaka ieng kali.
Ka seng kala ai jingmut ban don ki jaka ieng kali shabar ka Iaw Musiang na ka bynta ki Tourist bad kali kamai, la kyntu ba dei ban buh ia ki jaka ban ieng ki kali ban ap briew da kaba iamir jingmut lang bad ki seng nongniah kali ban don ka jingiatrei lang.
Ka seng ka kren shai ba kim dei ba ki don kano kano ka jingthut hynrei ban don ka jingpynbeit khnang ba kan iaid beit iaid ryntih ban lait na ka jingkhap ngiah kali ha Iaw Musiang kaba la buh jingeh ia baroh ki nongleit nongwan na ka bynta ka jingbit jingbiang lang donkam ban pynbeit ia ka jingieng ki kali.
