Shillong,Risaw 05: Ka long ka sien kaba nyngkong ia ka jylla Meghalaya ban ioh takma ksiar ha ka jingialehkai niah bicycle kaba la long ha Odisha ha ka jingialehkai kaba 23 National MTB Championship 2026 ia kane ka jingialehkai la pynlong da ka Cycling Federation of India.
Haba kren ha ki lat pathai khubor ha Shillong Press Club u bah Barnes A.Tiewla u la iathuh ba ka Meghalaya Cycling Association kala leit ban iashim bynta ha ka 23rd National MTB Championship ha Odisha bad ha kane ka jingialehkai ka jylla kala ioh ia ka takma ksiar kaba nyngkong ha ka jingniah bicycle na ka bynta kiba la rangbah.
Ha kane ka jingialehkai niah bicycle ka Meghalaya Cycling Association kala phah 12 ngut ki nongiashim bynta bad u bah Sharailang Basaiawmoit u la ioh ia ka takma ksiar ha ka kyrdan jong kiba la rangbah bad u la ioh ruh ia ka takma rynong ha kawei pat ka jingiakhun.
U President ka Meghalaya Cyling Association u la ong ba u bah Sharailang naduh ki por ba dang ai jinghikai u la pynpaw shisha ia ka jingkut jingmut jong u bad kane ka long shi bynta na ka jingpynkhreh ban ia shim bynta ha ka National Game ka ban long ha ka jylla u snem 2027 bad kane ka jingpynkhreh jong une u rangbah ka la long mynta lai saw snem lynter bad kane ka jingminot ka jong u kala pynlong ia ka jylla ba kan ioh ia u soh ka jingjop.
Ha kane ka sngi la iathuh ruh ba u samla Kevin Sangriang Lyngdoh u ba la ia shim bynta ha ka jingialehkai ha ka kyrdan jong ki khynnah u ruh u la ioh ia ka takma ksiar bad ha kawei ka jingialehkai ruh u la ioh ia ka takma ksiar.
U la iathuh ruh ba u Titus Ch Marak u la ioh ia ka takma rynong ha ka jingialehkai jong kiba la rangbah kane ka jingjop ka long ka burom ia ka jylla kaba kine ki nongialehkai ki la trei shitom ka burom ka leit ruh sha ki nonghikai bad baroh ka kynhun.
Ha kajuh ka por u President ka seng u ai khublei ia ka tnat ialehkai kaba la ai jingiarap ha kiba bun ki liang bad kane ka long ka burom kaba kila wanrah sha ka jylla bad kumjuh ia ka seng hi baroh kawei.
