Shillong, Risaw 05: Ka Seng samla pule Khasi Student’s Union KSU kala pan jamin ia u samla Pynkmenlang Sanmiet ka ban long lashai ka sngi bad kyrmen skhem ba ki nongialam ka seng lyngba ki muktiar kin ioh jamin ba lada ki nongialam ka seng ki ioh jamin ka long ka khubor kaba kmen na ka bynta ka seng bad ka jylla hi baroh kawei.
U samla Shiningstar Kharbikhiew u ba dei u Environmental Secretary ka seng haba kren ha ki lat pathai khubor ha ophis trei kam u la ong ba ka seng kala pan jamin ia u wei na ki nongialam ka seng u vice-president u samla Pynkmenlang Sanmiet bad kane kan long lashai ka sngi.
U samla Shiningstar u la ong ba u wei na ki nongialam ka seng u ba la shah kem ha ka 19/Nailur/2026 haba ka seng kala pynlong ia ka Bike Rally bad une u samla u dei u Pynkmenlang Sanmiet bad ha ka 3/Risaw/2026 la iohi ba la rah ia u sha Civil Hospital ban peit bniah halor ka koit ka khiah jong u.
Kum ki nongialam ka seng kila ioh ban iakren bad u bad la sngewthuh ba u don ha ka met ka bym bit bym biang, ka seng ka pynkynmaw ba ha ka 11/Naitung/2026 u samla Pynkmenlang u la shah sumar ha hospital na ka jingmih snam na ka khmut bad la pyllait ia u ha ka 21/Naitung/2026 hynrei ha ka 19/Nailur/2026 u la shah kem ha ka sngi ba ka seng ka pynlong ia ka Bike Rally.
Na ka liang jong ki pulit ha ka 16/Nailur/2026 kila ialam ia u samla Pynkmenlang sha Civil Hospital ban peit bniah ia ka jingkiew jinghiar jong ka BP bad na ka liang ki doktor na Civil Hospital kila ai jingmut ban leit rah sha NEIGRIHMS Hospital hynrei ym shym leit namar ia u la sumar teng ha Bethany Hospital.
U samla Shining u ong ba lada jia eiei ia u samla Pynkmenlang ka sorkar ka dei ban shim ia ka jingkitkhlieh ym tang ba u dei u nongialam ka KSU u dang dei ruh ban pyndep ia ka jingpule PhD jong u hapoh ka skul bah NEHU ha ka shnat pule ba iadei bad ka kam ain bad une u samla um shym la ioh ban ai ia ki jingthoh ha u bnai Jylliew bad lada jia eiei ia ki nongialam ka sorkar ka dei ban shim ia ka jingkitkhlieh.
