Shillong, Risaw 07: Ki nonghikai hapoh ka lama jong ka All Meghalaya Primary School Teachers Association mynta ka sngi 07/Risaw/2026 kila mih paidbah ban ia khih halor ki phra tylli ki mat jingdawa kaba ia dei bad ki nonghikai ha ki skul Primary ha kane ka jylla.
Ia kane ka jingiakhih kila pynlong da ka jingiaid paidbah na khmat iing dorbar shnong Golflink bad poi sha khyndailad phai biang sha Polo bad poi biang sha iing dorbar shnong Golflink ha kane ka sngi da ki spah ngut ki nonghikai na kylleng kila wan ban ia shim bynta.
Ha ka jingkren jong ka kong Daribha Vice President jong ka AMPSTA kala kren halor ki phra tylli ki mat jingdawa kaba kila thoh ha ka banner, kita ki long ban pynneh ia ki kam kiba lait ha ki skul sorkar bad ki skul deficit.
Ka sorkar ka dei ban thung noh ia ki nonghikai ha ki kam kiba la long thylli ha ki skul sorkar bad ki deficit bad ha kito ki skul ba don tang u wei u nonghikai, ka sorkar ka dei ban pyllait ia ki nonghikai na ka kam thoh kyrteng nongthep vote.
Ka sorkar ka dei ban ithuh noh ia ki nonghikai kiba la thung shuwa u snem 2007 kum ki nonghikai skul sorkar, ka sorkar ka dei ban pynshai paidbah ha kaba ia dei bad kine ki mat jingdawa ki nonghikai, ha kane ka sngi u General Secretary ka seng u bah F.C Shullai u la ai jingkren ha kane ka jingiakhih ki nonghikai.
