Shillong, Risaw 09: Ka tnad Rural Development, ha ka jingiatreilang bad ka Meghalaya State Rural Livelihoods Society (MSRLS), sorkar Meghalaya bad ka National Academy of RSETI (NAR), kala pynlong iaka jingialang ba ar sngi ka National-Level Review jong ka Rural Self Employment Training Institutes (RSETI) na ka bynta jong ki nongseng kam lajong ha kane ka nongbah Shillong.
Kane ka jingialang kala bishar iaka jingiaid shaphrang bad ka rukom pynlut pisa bad ka kdew ruh iaki kam ba hakhmat kiba dei ban pyndep ha kine ki bnai kiba dang sah jong ka snem mang pisa, da kaba pynialang lang iaki ophisar na ka tnad, ka sorkar jylla, ki SRLM, ki bank ba ai jingiarap bad ki RSETI na ka ri baroh kawei.
U Rohit Kansal, u Secretary ka Ministry of Rural Development, u la kren shaphang ka kam ba kongsan jong ka RSETI ha kaban ai jinghikai, seng kam lajong, ka jingiada jingiarap bad ka jingioh ram ban kyntiew iaki lad kamai ja kpoh kiba ryntih bad kiba neh haka nongkyndong.
Naduh ba sdang ia kane ha u Kyllalyngkot 2009, katei ka prokram kala lah ban tei haduh 647 tylli ki RSETI ha kylleng ki 634 tylli ki distrik, ai jinghikai 64 lak ngut ki paidbah bad la ioh kumba 72 persen ki jingpynbeit.
Ki mat ba kongsan hangne ki kynthup iaka jingpyn khlain iaki jingiasnoh bad ki bank ban ioh ram, pynthymmai iaki jinghikai, ka jingpynbha iaka rukom hikai ki nonghikai, ka jingpynroi iaki model RSETI bad ka jingpynphriang iaki lad kor bor digital, kynthup lang bad ka jingpyndonkam iaka Artificial Intelligence (AI). Ki jingiakren ki kynthup lang ruh iaki sap thymmai ba dang mih, ki jingpynkylla hapoh ki shlem treikam, ki rukom treikam ba bha tam bad ki khana jop jong ki nongioh jingmyntoi.
