Shillong, Risaw 09: Ki nongshet ja sngi ka jylla mynta ka sngi 9/Risaw/2026 kila rai ba naduh ka taiew ban wan jong u bnai Risaw,2026 kin leit shet tang shisien shitaiew bad ha ka taiew ba nyngkong jong u Rymphang, 2027 kin sa lum biang ia ka jingialang kaba heh ban shim ia ka rai ba tyngeh.
Ia kane ka rai la pynbna da ka president ka Union of cook cum helpers PM Poshan ka kong Gina Nengnong ha ka jingialang bah ki nongshet kaba la long mynta ka sngi ha madan Malki.
Ha kane ka jingialang la iohi ba ki nongshet ja sngi na kylleng ki jaka jong ka ri lum Khasi Jaintia bad Garo kila wan ban shim bynta, ban pynpaw ia ka jingsngewkhia halor ka jingbymlah ka sorkar India ban pynkiew ia ka Honorium na ka 900 tyngka sha ka 9000 tyngka shi bnai.
Haba kren ha kane ka sngi ka President ka seng ka la ong ba ki nongshet ja sngi ka jylla haduh mynta ki dang ap ia u Myntri Rangbahduh ka ri u Narendra Modi ba un jubab ia ka jingdawa jong ki bad haduh mynta ki dang ap ia ka sorkar ba kan shong ia ka Union Cabinet.
Katba ki dang ap ia ka jubab na u Myntri Rangbahduh, kila rai ba naduh ka taiew ban wan jong une u bnai Risaw, kin shet tang shisien taiew bad kin iarap sam ia u khaw sha ki khynnah khnang ba u khaw un lait pyut.
Kin trei kumba ki thoh ba ka kam jong ki ka dei trei mon sngewbha, ki ruh kin trei sngewbha. Nalor kane, katba ki dang ap ia ka jingthoh na u Narendra Modi, ha ka taiew ba ar jong u Rymphang kin sa lum ia ka jingialang bah ka kaba heh bad kin shim ia ka rai ba khatduh lada ki ioh ia ka jubab kin bteng bad pynbha ia ka kam bad lada kim ioh ia ka jubab ban pynkiew ia ka Honorium, kin pynbna ban pynkut noh syndon ia kane ka skhim.
Na ka liang ka kong Gina kala kyntu ia baroh ki nongshet ja sngi ba kin mih madan biang lada ki khot jingialang ha u bnai Rymphang, 2027 ha kajuh ka por kala kyrpad ia baroh ki nongshet ja sngi ba kito ki bym pat leh ia u Addhar, ba ki dei ban leh noh khnang ban ym don jingthut haba iadei bad ka Honorium.
