Shillong, Risaw 12: Mynta ka sngi 12/Risaw/2026 ka tnat jngoh kai pyrthei bad ka tnat ka kit ka bah kila khot biang ia ka jingialang ki nongniah kali kamai, kiba buh ia ki iingbasa bad kumjuh ia kito ki nongialam lynti ia ki nongjngoh kai pyrthei ha kane ka jylla Meghalaya.
U bah Ricaldinus Dohling haba kren ha ki lat pathai khubor hadien ka jingialang la iathuh ba na ka liang ka sorkar kala ai jingmut ban don kawei ka Committee ban iadon lang ki trai ba buh ia ki iingbasa, kiba ialam lynti ia ki nongwan jngohkai pyrthei bad ki nongniah kali kamai.
U bah Dohling president ka All Khasi Meghalaya Tourist Taxi Association u la ong ba na kane ka jingiakren kaei kaba ka seng ka shim ba 20% haduh 30% kila ioh ia ka jingdawa jong ki kaba ki la iakhun mynta la ar lai snem hynrei ha kajuh ka por ia kaba dang sah ki buh ha ka jingstad jong ka sorkar ban pynkhreh ia kata ka jaka ieng kali kaba kila buh ha khmat ka sorkar.
Ha ka jingialang la pynsngew ha khmat ka sorkar ba ki jaka jngoh kai pyrthei kam dei tang ha Sohra hynrei ki don ha kylleng ki bynta jong ka Meghalaya bad ha kane ka jingialang u symbud myntri rangbah ka jylla u la ong ba ha Jaintia Hills ka don ka jaka ha Thadlaskein.
U wei na kiba pyniaid ia ka iingbasa ha ka jylla Meghalaya u la ong ba ka jingwan ki nongwan jngoh kai sha kane ka jylla kila sdang kiew biang bad kila don bun ruh kiba la pan kamra lypa shuwa ba kin wan sha kane ka jylla bad kumba ka long mynta ka jingwan ki nongwan jngoh kai pyrthei ka long kumba ju long hi.
