Shillong, Risaw 12: Mynta ka sngi 12/Risaw/2026 ki nongialam ka Khasi Student’s Union kila leit ban ia kynduh ia u Labour Commissioner ban ia kren ha kaba iadei bad ki san tyllli ki mat jingdawa kiba ka KSU kala buh ha khmat ka sorkar.
U samla Shiningstar Kharbikhiew Environment Secretary haba kren ha ki lat pathai khubor hadien ka jingiakynduh ia u Labour Commissioner la ong ba ka jingiakren ka dei halor ka ain ka Meghalaya Identification, Registration (Safety & Security) of Migrant Workers Act, 2020.
Haba iadei bad kane ka ain ka seng kala ioh ban iakren bad u myntri rangbah ka jylla u Conrad K.Sangma, hadien jong kata la don ka jingiakren bad u Chief Secretary ka jylla bad mynta ka sngi kila ioh ban ia kynduh ia u Labour Commissioner bad ka thong jong ka seng ka kwah ban iohi ba kane ka ain kan treikam ha ka jylla.
U samla Shiningstar u la ong ba kane ka jingwan kwah ban tip haduh katno kala treikam, ha kane ka jingiakynduh kum ka seng ka pynpaw ia ka jingsngewtynnad ha kaba u Labour Commissioner u la iathuh ba na ka liang ka tnat sorkar bad ka sorkar kila pyntreikam ia kane ka ain ha kaba ka sorkar kala ai ia ka jinghikai ia ki ophisar ha kaba iadei bad kane ka ain.
Na ka liang ka seng KSU ka kwah ban kren shai sha ki kontraktor, ia kiba ai kam ia ki briew kiba na shabar ka jylla, kum ka seng ka lap ba kiba bun ki don tang ia ka slip hynrei kila treikam hynrei kaei kaba ka seng ka kwah ban ong ba ki kontraktor bad kito kiba ai kam ki dei ban pynbiang ia ki kot ki sla katkum ki kyndon ba la buh.
