Shillong, Risaw 12: U President Jong ka All Jaintia Muster Roll Workers and Labour Union u bah Khroo L.Pariat kum ka seng kila phah ia ka jingthoh sha u myntri rangbah ka jylla u Conrad K.Sangma ban ai khublei ia ka rai jong ka kabinet kaba la pynjlan ia ka rta treikam ki muster roll na ka 58 snem sha ka 60 snem.
Haba kren ha ki lat pathai khubor ha Shillong Press Club la iathuh ba kane ka rai jong ka sorkar ban pynjlan ia ka rta treikam ki muster roll kan long naduh ka 25/Nailur/2025 da kane ka jingpynbna sorkar kala pynskhem ba ia ka rta treikam kan long 60 snem.
Kum ka seng ka dawa ruh na ka sorkar ba kan khot biang ia ki muster roll kiba la shong thait hadien ka 25/Nailur/2025 haduh ba kin da dap 60 snem ka rta namar kila don ki muster roll kiba la shah pynshong thait noh ha ka rta kaba 58 snem.
U bah Pariat u la kyntu ia ka sorkar ban pyntreikam noh ia ka Employees Provident Fund bad ia ka Miscellaneous Provision Act 1952, ka sorkar ka dei ban thaw noh ruh ia ki Departmental Muster Roll Worker Welfare Board na ka bynta ki nongtrei.
U President ka seng u la kyrpad ia ka sorkar ba ia ka kam ban peit ia ki Muster Roll dei ban pynkynriah noh na ka Personal Department sha ka Labour Department kane ka long ban pynkloi ia ki jingtreikam ha kaba iadei bad ki Muster Roll.
