Dangar, Risaw 12: Ka Dangar Dombah Government Lower Primary School kala pynlong iaka jingkut jong ka da kaba rakhe iaka jingdap 50 snem jong ka, kaba long ruh ka jingsah jingkynmaw ha ka jingdap 50 snem jong ka jingnoh synniang ha ka liang jong ka pule puthi bad ka jingsan jingroi ki khynnah pule bad nyngkong.
Katba u Myntri ka pule puthi, u bah Lahkmen Rymbui u la don lang ha katei ka jingrakhe bad u la dep pyllait iaka kot thoh sah jingkynmaw jong ka jingdap 50 snem katei ka skul, kaba long ruh kum ka jingthoh shaphang ka histori kane ka skul, ka jingjop bad ka jingleit jingwan ha kine ki sanphew snem ba la leit.
Ha katei ka prokram, la don lang u bah H.M. Shangpliang, nongai ktien jong ka sorkar Meghalaya lyngba ka tnad pule puthi, u Rev. R.M. Thongni, Principal jong ka Riwar Secondary School, Dangar; Fr. James Mawa, Principal ka St. Peter’s Higher Secondary School, Dangar; uba pyniaid iaka skul; u rangbah shnong ka Dangar; nongmihkhmat jong ki katto katne ki shnong ba jan bad kiwei kiwei ki nongseng kam lajong, ryngkat ki kmie ki kpa, nonghikai bad ki khynnah pule.
Katba ki nonghikai barim kila sam iaki jingsah jingkynmaw jong ki bad kaba phai dien bad pyrkhat halor ka jingroi bad ka lynti iaid jong kane ka skul ha kine kien iewphew snem kiba la dep. Kane ka skul kaba don ban pynrung kyrteng 290 ngut ki khynnah skul ka dang iaineh ban pynbiang iaka jingnang jingstad kaba radbah iaki khynnah ha kane ka thain.
Ha katei ka prokram, u bah Lahkmen Rymbui u la ban jur halor ka jingtrei shitom jong ka sorkar ban pynskhem iaka bynta jong kane ka skul lyngba ki jingtei ba paka jong kane ka skul, ka jingkyrshan jong ki nonghikai bad ka lad ban pynioh iaka jingbiang ka pule puthi ki khynnah skul. U la ong ba ka sorkar kala kular ban pynioh iaka pule puthi bad pura bad ai lad iaki khynnah pule ba kin pynroi iaka jinglah jong ki.
U bah Rymbui u la ai jingiaroh iaki nonghikai na ka bynta ka jingtrei shitom jong ki ha kaban ai jingnang jingstad bad pynheh pynsan iaki khynnah skul. U la pdiang iaka jingnoh synniang jong ka jingpyniaid ia kane ka skul da ka School Management Committee bad u la ai khublei iaki kmie ki kpa na ka bynta ka jingshaniah jong ki ia kane ka skul.
U bah Shangpliang ruh u la kren shaphang ka jingdonkam jong kane ka skul bad ki mat ba kongsan bad u la ban jur halor ki jingdonkam jong ka jingiatreilang jong ka sorkar, ki nongpyniaid kane ka skul, ki kmie ki kpa bad ka imlang ka sahlang ba iar. U la kyrpad iaki nongseng kam lajong ba kin kyrshan ia kane ka skul ba kan iai bteng iaka jingiaid lynti jong ka pule puthi kane ka skul.
Ki khynnah pule kila pyni la ki sap jong ki da kaba ia shad iaki jingrwai tynrai kum shi bynta jong ka jingrakhe, da kaba bynrap iaka jing pynshongshit ne pynkhraw shuh shuh iaka rukom rakhe iaka jingdap 50 snem kane ka skul.
Kane ka jingrakhe ka long kum u maw jam ba pynsah jingkynmaw iaka histori jong ka Dangar Dombah Government LP School, da kaba rakhe iaka jingnoh synniang ha kine ki 50 snem bad pyn thikna iaka jingkut jingmut jong ka sorkar, ki kmie ki kpa bad ka imlang ka sahlang ha kaban pynskhem iaka pule puthi bad ban thaw iaki lad ki lynti kiba kham bha na ka bynta ki pateng ban wan.
