Shillong, Risaw, 12: Mynta ka sngi ka 12 tarik, Risaw, 2026, ha ka por 1:00 baje shiteng synnia ha kaba ka dei ka por jong ka jingdon ka jingkhynra ia ki kali kaba man ka por ha Damcherra, Kuliang kaba hap hapoh ka Umkiang PPP, da ki pulit ka distrik jong ka East Jaintia Hills, kila ioh kem ia kawei ka kali kit nongpang ba dei ka Maruti Ecco ba don ia u registration No. ML-13-B-1459, ha kaba la lap ia 27 tylli ki synduk plastik sabon ba la suba ba dei u kynja jingdih pyn buiad ba khia 409.89 gram bad ba shongdor 1.5 klur.
Katei ka kali kala iaid na Silchar, Assam bad kala iaid sha Guwahati, ha kaba katei ka kali kala poi ha Naka point ha kane ka shiteng synnia bad haba la talasi da ki pulit, la lap ba la buhrieh hapoh kane ka kali ia kine ki song plastik. La ong ba ha katei ka kali, la don saw ngut bad la kem noh iaki ba kynthup ia u Alom Hussain Laskar, Nazim Uddin Burbhuiya, Manir Hussain Mazumdar bad ka Hashina Mamata Choudhury, kiba dei ba sah ha Silchar, Assam.
Kane ka jingkem ia kine ha kane ka jaka jong ka jylla kiba wan na ka thain lam mihngi, ka long kum shi bynta jong ka jingleit khynra kaba jur da ki pulit ha ka jylla baroh kawei pyrshah iaki kynhun beain ba pyntriem ha ki kali. Ha kaba iadei bad kane ka jingshah kem, la dep registar da ka ejahar ha Lumshnong P.S vide Case No. 39(10)2026 hapoh ha kyndon jong ka ain 8(c)/21(c)/29 NDPS Act.
