Shillong, Naiwieng 15: Ki nongrep ka South West Garo Hills District kila thung bun jaid ki jaidsoh lyngba ki skhim jong ka sorkar bad kane kala iarap ia ki ban dang pynbha shuh shuh ia ka rep soh bad kane kala kyntiew ia ka ioh ka kot ka jong ki.
Ka kynhun ki nongthoh khubor da ka jingialam jong ka tnad pathai khubor ka sorkar jylla la ialam ia ki sha ki jaka rep bad ba kin iohi ia kaei kaba la leh na ka bynta jong ki nongrep kiba dei ki trai shnong, ha ka shnong Harigaon kaba hap hapoh jong ka Rerapara Block, laleit ban jngoh ia ka jaka rep jong u Nerdaya Koch, ha kaba u la sdang ban rep jhur naduh u snem 2013-2014 khlem pyndon kam dawai.
Ka jaka kaba u rep ka don tang 1.5 hectar ha kane ka jaka u thung ia ki jhur baroh saw aiom bad tlang bad lyiur bad na ka liang jong ka sorkar ruh ka iarap ia u na ka por sha ka por na ka scheme Vegetables Development Scheme bad ka jingiarap ka long da ki symbai kiba bha bad ka jingiarap ka long haduh 75% bad ki don ka jingiarap kiba 100%.
Kane ka jingiarap kaba la ai da ka sorkar kala pynlong ia u ba unioh ia ka kamai haduh 7 bad 8 lak tyngka ha u snem 205-2026 bad ka kam kaba u leh ka long ban pynmih ia ki symbai bad die pat sha kiwei ki nongrep ha ka dor T.2.5/- tyngka shitynrai.
Ka kynhun ki nongthoh khubor kala leit ruh sha ka jaka rep soh Dragon fruits jong u Robelson M. Marak ha Ampati Songma ia kaba u la sdang thung ha u snem 2023 bad la sdang ban soh ha u snem 2025 bad ka jingmih soh ka long kumba 80 haduh 100 kilo bad ka jingmih ka long kumba T.35,000/- tyngka haduh T.50,000/- tyngka.
Ha Zikzak Horti Hub la ialam ban peit ia ka jaka pynkha ia u syntiew Anthurium, Gerbera bad Dendrobium ia ki la thung hapoh ka iing kaba 500 sq meter, kane ka skhim ka dei ban long 1,500 sq meter haka jinglut kaba T.70 lak tyngka ia kaba la sdang ha u snem 2023 bad la pyndep ha u snem 2025 bad ka jingmih na kane ha ka shi snem da kaba dei ia ki syntiew bala ot ka long ar lak tyngka ba pynpoi ia ki syntiew da ka M/s Phira Enterprise, Shillong.
