New Delhi, Naiwieng 15: Ka tnad tohkit ia ki kam bamsap bad kumno ban knieh noh ia ki jingdon jingkem ka Central Bureau of Investigation (CBI) jong ka sorkar pdeng kala ai jinghikai shitaiew lynter ia ki ophisar na ki 16 tylli ki ri ka pyrthei ban tohkit ha ki kam bamsap bad ban shim ia ki jingdon jingem haba la lap ba la tei ia ki na ka jingbamsap.
Ki 24 ngut ki ophisar kiba la wan ban shah hikai ki long na ka ri Botswana, ar ngut na Lebanon, Mali, Mauritius, Nigeria, Tanzania and Zimbabwe bad u wei u wei na Ethiopia, Ghana, Iraq, Madagascar, Maldives, Myanmar, Namibia, Panama and Paraguay.
Ha kane ka kynhun la kyntup 11 ngut ki kynthei bad 13 ngut ki shynrang baroh kine ki ophisar kid ei na ka tnad Law Enforcement bad Investigation fields. Ha kane ka shitaiew la hikai ia ki shaphang ki ain kiba ia dei bad kane ka kam tohkit ia ki kam bamsap.
Ha kane ka shitaiew la ialam ia ki ban peit ia ka jaka trei kam jong ka CBI ha Delhi bad ha ka juh ka por la ialam ia ki ki jaka sahnam ha ki kot History kiba don sawdong ka nongbah Delhi.
