Shillong, Naiwieng 15: Ka balang Katholik kala buh ia u Naiwieng ba un long u bnai ban duwai naka bynta ki mynsiem kiba la khlad noh ha ka jingngeit ba ka mynsiem kan poi sha bneng ha khmat u nongbuh nongthaw.
Ia u Naiwieng la buh ban kynmaw ba duwai kyrpang na ka bynta kito ki mynsiem kiba la khlad namar ha ka jingngeit ka balang Katholik ba kum ki briew ki don ka lait la let kumta ka mynsiem kan nym lah ban beit sha u nongthaw, ki ngeit ba ki poi ha dingpynkhuid ban pynbit pynbiang shuwa ban poi ha khmat u nongthaw.
Ka balang mynta u bnai naduh ba sdang haduh ba kut ka pynlong ia ka jingkyrkhu ia ki lum jingtep ban duwai na ka bynta ki mynsiem kiba la khlad ba u nongbuh nongthaw un pynjem ia ka mynsiem jong kiba la khlad.
Mynta ka sngi ki parish ha kylleng jong kane ka sor Shillong kila pynlong ia ka jingkyrkhuh ia ki lum jingtep mynta ka sngi, ha Mawprem la wan ban ia shim bynta da u Bishop Rev. Victor Lyngdoh ha ka jingdon lang ki phadar bad ki riewniam ha ryngkat kiba ha iing ha sem ki lok ki jong jong ki mynsiem bala thiah ha u tei u lum jingtep.
