Ioh rung ka Mawpdang sha ka Semi phainal ka SSA Champion Cup 2027

Shillong, Naiwieng 22: Ka Mawpdang SC ka la sei ia ka buit ka bor ialehkai tad haduh ba kan da jam syndon sha ka semifinal ka lympung SSA Champions Cup kaba la wan hadien ba ka la lah ba kan pynliem da 10-1 pyrshah ia ka Lamlynti FC ha ka jingiakhun jong ka Group A ba la long hynne ka sngi.
Ka Mawpdang ka rung sha kane ka jingiakhun da kaba ka donkam ia ka jingjop ka bym duna ia ka 8 kol, ia kaba ka la lah ban leh kham bha shuh shuh ban ia kaei ba ka donkam, kaba pynlong ia ka ba kan lah knieh noh na ka kynhun ialehkai ka Mawpat SC ha ka miej iakhein point, kaba wan hadien ba kine ki ar kynhun ki la ioh ba kin ia khur mar 7 point, namar ba ka head to head kam don jingmyntoi satia ia kine ki ar kynhun namar ba ka jingiakhun pyrshah ka jong ki, ka la kut noh ha ka jingiakhaid kaba long da mar ar kol, bad ka Mawpdang ka la kiew sha ka kyrdan kaba ar halor ka nongrim ka jingiapher ia thep kol (goal difference +10 la +8).
U Donlad Diengdoh (57’, 61’, 64’) u la lah ban lam khmat ban thep ia ki lai tylli ki kol ha ka kylla miet kaba pynlong artad ia u ban lam khmat ha ka liang ka jingioh thep kol ha kane ka lympung sha ki 7 tylli ki kol, bad ia ki kol kiba sah la thep ia ki da u Dibinroy Nongspung (13’, 41’), Banaijingshai Kharkongor (29’), Jonathan Kharbani (37’, 90’+1) Mebanshngain Kurkalang (40’, 50’).
Ia ka shi kol ban lait brut ka Lamlynti FC la thep ia ka da u Bitolin Kharwanniang (78’).
Lyngba kane ka jingjop, ka Mawpdang SC ka la thaw ia la ka khana sah nam ka jong kaba kan long ka kynhun ba nyngkong ba lah ban jop ia ka jingiakhun haduh ki ar dak jingkhein (double digit)
Ha kawei pat ka jingiakhun ba la pynlong lang ha ka juh hi ka por, ha madan ka MFA Turf, kaba dei ka jingiakhun ka Group B, ka Sanmer SC ka la lah ba kan ieng iakhun tyngeh ban pynliem noh ia ka Sei La Sap da 2-1.
Ka khana jong kane ka jingiakhun ka long ba ka Sei La Sap kaba la ioh ban pynkhih nyngkong ia ka jar lyngba u Arkimanbha Nongkhlaw (28’), hynrei ka Sanmer SC ka la kthong kylla hadien ba kan thep ia ki artylli ki kol ki jong ka lyngba u Damutskhem Umdor (31’) bad Velerian Lyngdoh (79’).
Ha kane ka kynti jong ka jingiakhun, ka Sei La Sap ka la hap ruh ba kan ialehkai satang 10 ngut ki player ha madan, hadien ka jingshah sei noh shabar ka madan (red card) ka jong u Hamebanshanlang Kharbangar.
Kumta kaba sah ka long ban ia phai sha ka jingiakhun kiban long ha ka sngi nyngkong ka taiew kaban wan, ha kaba ka Shillong Lajong FC kan iakhun pyrshah ia ka Sohryngkham ha ka por 2:30 nohphai sngi ha SSA Stadium, ban bynrap lang ha ka juh ka por da ka jingiakhun hapdeng ka Mawlai SC pyrshah ia ka Nongkrem SC ban long ha madan ka MFA Turf, Polo.

What Next?

Recent Articles

Leave a Reply

Submit Comment

*