Mawkyrwat Nohprah 18: Da ka jingthmu ban ai ia ka jingsumar kaba bit ba biang na ka bynta ki nongkyndong ba kin ioh ia ka koit ka khiah na ka liang jong u ka sorkar lyngba ka National Rural Health Mission (NRHM) da ka jingiatreilang bad ka District Medical Health Officer jong ka Nongstoin ki la pynlong ia ka Health Mela ha Ranikor mynta ka sngi.
Ha ka jingkren jong u Deputy Chief Minister ba dei peit ia ka koit ka khiah u Bah Rowell Lyngdoh u la ong ba na ka liang jong ka sorkar ka la ialeh katba lah ban wad ki lad ki lynti ban pynioih ia ki lad jingsumar na ka bynta jong ki paidbah ka jylla.
Ha kane ka sngi na ka liang jong u myntri u la ong ruh ba bun na ki jingpang kaba ki briew ki ioh ka dei na ka jingleh bym suid niew hi da lade. Na ka liang jong u myntri u la kyntu ia ki paidbah ba kin long kiba shim khia ban sumar khuid ia lade ban lait na bun ki jingpang.
Ha kane ka sngi u MLA jong kane ka jaka u Bah Martin M Danggo bad u MDC u Bah Manstudy Nongrem ruh ki la ia don lang ban sa khi ia kane ka sngi. Ha kane ka sngi da ki hajar ngut ki briew ki la poi na kylleng katei ka thain ban shah sumar ha kane ka jingsam dawai ei jong ka sorkar.
Ki doctor kiba la ia poi sha kane ka Health Mela ki long na Nongstoin bad na Shillong. Ha kane ka sngi la sam ruh ia ki dawai sha ki paidbah jong ka thain Ranikor.(SP News)
