Shillong, Jymmang 1: U wei u nongialam jong ka seng GNLA u lah ban dei u wei na ki commander u la duh ia la ka jong ka jingim ha ka jingiather kuli bad ki pulit ha ka Daji Badimagre-Boldakgre mynta ka sngi ha South Garo Hills District.
Ki thymmei khubor ki iathuh ba ki pulit ha dien ba ki la ioh ia ka jingtip kaba biang ki la leit ban khynra ia katei ka jaka bad ka jingthwet ia ki lehnoh ha katei ka jaka ka dang bteng.
Ka kynhun pulit kaba kyrpang ia kaba la tip kum ka Special Weapons and Tactics (SWAT) commandos, ia kaba la kyrshan lang da ka kynhun Combat Battalion for Resolute Action(CoBRA) kila khynra ia katei ka jaka ban beh noh ia ki lehnoh.
Na ka tei ka jaka ki pulit kila ioh kurup kawei ka suloi AK 47, ki kuli bad shibun ki kot ki sla kiba ia dei bad katei ka seng. Na kane ka jaka la ioh ruh shibun ki uniphom ba la pyndon kam da ki lehnoh. Katba thoh ia kane ka khubor ym pat lah ban ioh lut ia ka jingtip ha kaba ia dei bad kane ka jingjiasait hapdeng ki pulit bad ki lehnoh.(SP News)
