Shillong, Nohprah 30: Ki shipai BSF bad ki pulit Special Operation Team ha dien ba ki la ioh jingtip ia ka jingiaid jingieng jong ki dkhot ka GNLA ha ki thain Phodkroh ki la leit ban khynra ia katei ka thain ha kaba ki la ioh ban kem ar ngut ki dkhot jong kane ka seng kyntup ia ka kynthei.
Kine kiba la shah kem ki long ka M Sangma kaba dang 20 snem ka rta na ka shnong Karaigora bad u Chota N Sangma 30 snem ka rta na ka shnong Lower Puksora kine ki shnong baroh ki don harum jong ka shnong Phodkroh kaba hap hapoh jong ka South West Khasi Hills.
Na kine ki ar ngut ki BSF ki la ioh ban kurup kawei ka pistol .22 bad hynriew tylli ki shithi dawa pisa kiba la mang ban sam sha ki nongkhaii katei ka thain. Ha ka jingthohkit ki la phla ba ki dei ki dkhot jong ka seng GNLA.
Ha kawei pat ka jingjia ki BSF ki la ioh ban kurup shibun ki masi bad ki jingdih pynbuiad bad ka dor jong ki ka la kot sha ka T.3.53 lak tyngka. Na ka liang jong ki BSF ki la aiti ia kine kiei kiei baroh sha ki bor jong ka ain ban leh ia kaba don kam.(SP News)
