Shillong, Kyllalyngkot 10: Katkum ka khubor kaba la phah da ki pulit jong ka jylla la ong ba ha ka miet 9 tarik mynta u bnai ki la ioh ban kem ia u Bah Spainwell Marbaniang 43 snem ka rta u ba shong ba sah ha Mawlai Umsohkrot halor ka jingsuba ba u dei u nongkhaii drugs.
Ki pulit kiba la bud dien ia u ki la bat ia kawei ka Maruti kaba don ia u number AS0 1P 7169 bad na kane ka kali ki la ioh ban kurup 4896 tylli ki kuli kapsul ia u ba la tip kyrteng kum u spasmoproxyvon, 370 tylli ki dawai kuli ia kaba la tip kyrteng kum u nitrozapam, nalor kitei la ioh ruh ban kurup ia ki tin ba thep Golden ia kaba la thep da u Drugs uba la tip kyrteng kum u Herion.
Nalor jong kitei ki tiar ha ka jingleit talasi ia ka iing jong u tei u rangbah la ioh ban kurup ar tylli ki pisatol kai kiba la song bha hapoh plastic, kane ka jingsong bha ka la pynsuba sniew shibun ia ki pulit. Na ka liang jong bor pulit mynta ki dang tohkit ban lap ia kiwei pat, la iathuh u Superintendent ki pulit ka East Khasi Hills.(SP News)
