Shillong, Kyllalyngkot 24: Ka seng HSPDP kaba la rim tam ha kane ka jylla Meghalaya la shai ka sngi kan pynlait paidbah ia ka kular election ha ophis trei kam jong ka ha Laban ha ka por 12 baje shiteng sngi, ia kane ka kular un pynlait da u president jong ka seng u Bah Hopingstone Lyngdoh.
Katkum ki lad khubor kiba la ioh da u SP News Agency ki iathuh ba ka mat kaba ha khmat eh ba ka HSPDP kan kular ha khmat jong ki paidbah ka long ban ialeh ban pynioh ia ka Ri Khasi Jaintia State, kawei pat kadei halor u pud u sam ba ka jylla kam pat lah ban ia pynbeit bad ka jylla Assam.
Haba ia dei pat bad ka lad ioh kam ioh jam la ong ba ka HSPDP kam shym la buh ia ka thong kaba kyrpang hynrei ka ong ba ia ka rukom bhah kam kaba mynta dei ban pynkylla noh namar ka 40% kaba ka don mynta ka la noh shiliang.
Ki thymmei khubor ki iathuh ba ka HSPDP kan ia khun ha kane ka election tang na rilum khasi jaintia kaba don 36 tylli ki constituency, la sngewthuh ba kan nym pynieng kyrtong lut ha baroh kine ki jaka.(SP News)
