Kyntu U Lat ia ki lehnoh ban ia pynbeit ia ki jingeh da ka lynti kaba suk

Shillong, Kyllalyngkot 26: U lat ka jylla u Meghalaya Mr  Ranjit  Shekhar  Mooshahary ha ka jingkren ka jong u ha ka jingrakhe ia ka sngi Republic Day kaba 64^th ha Madan Polo u la ong ba ki seng lehnoh ki dei ban wan sha khmat ban ia pynbeit ia ka jingeh ka jong ki ha ka lynti kaba suk. U la ong  ba ka jingiakren ia suk ha pdeng ka ANVC bad ka sorkar ka don ka jingkyrmen ban wanrah ia ka jingsuk ha kane ka jylla.

Ha kane ka sngi na ka liang jong u Lat ka jylla u la ai ka jingiaroh ia ki pulit jong ka jylla bad ia ki kynthun shipai bapher bapher jong ka sorkar pdeng kiba don ha kane ka jylla namar dei tang ka jingtrei shitom ka jong ki ba la pynlong ban pynjem jai ia ka jingdon ki senglehnoh ha kane ka jylla.

Ha kane ka sngi u la kdew ruh ha ka jingkren ka jong u ba ka jylla ka don ka jingia tyngkhuh ha kaba ia dei bad u pus sam la ka long bad ka Bangladesh bad kum juh bad ka jylla Assam ia kaba dang hap ban ia pynbeit. Haba ia dei bad ka Bangladesh u la ong ba ka sorkar pdeng ka la dep ban ia soi ia ka soskular hapdeng kine ki ar tylli ki ri u kyrmen ba kin sa lah ban pynbeit noh shen.

Haba ia dei pat bad ka jingdon ia ki mar poh khyndew ha kane ka jylla u la ong ba ka jylla Meghalaya ka dei kaba la kyrkhu shisha ha kaba la jan baroh ki marpoh khyndew ki don ha kane ka jylla. U la ong ba ia ki dei ban tih ha ka rukom kaba katkum kane ka juk kaba mynta lada tih pathar ia ki mynta kan long ka jingtim ia ki pateng ban wan.

Ha ka jingkren jong u Lat u la kdew bun kiei kiei kiba don kam, ha ka liang ka pule puthi, ka ki kam ia lehkai nad bun kiwei de. Ha kane ka sngi u la pynkynmaw ba ha ka jingialeh laidluid ki la don ki riew khraw jong kane ka jylla, kum u Kiang Nangbah, U Tirot Sing, U Patogan A Sangma ryngkat bad shibun kiwei kiba la ia leh pyrshah ia ki phareng.

U la ong ba dei ha kum kane ka sngi ba 63 snem mynshuwa ki paidbah jong ka Ri India ki la ai halide ia ka riti synshar kaba ngi pyndon burom ia kane ka sngi kum ka Republic Day. Ia ka lama lai rong jong ka Ri La pynher da u Lat jong ka jylla bad la shim ruh ia ka salute na ki kynhun shipai kiba la pyndon burom ia kane ka sngi.(SP News)