Shillong, Kyllalyngkot 27: U MLA jong ka Nongkrem Constituency u yn sa hiar shuki noh na ka kam MLA ha ka 30 tarik mynta u bnai bad ha kane ka juh ka sngi yn mih noh ruh na ka seng United Democratic Party.
Katkum ki thymmei khubor kiba la ioh da u SP News Agency ki iathuh ba u Bah Ardent um kwah ban leit thep ia ka nomination jong u khlem pat da hiar shuki namar ha kane ka kynti kaba mynta yn ia khun noh na kawei ka seng sain pyrthei kaba lah ban dei ka seng HSPDP.
Ha katei ka sngi na ka liang jong u Bah Ardent un mih noh syndon ruh na ka seng UDP kaba u la jop ia ka election ha u snem 2008. Kane ka jingmih noh jong u Bah Ardent na ka seng kan ktah shibun ia ka seng UDP.
Kumba ka long na ka liang jong u Bah Ardent ha ka por ba u rung sha ka UDP u don ka jingkyrmen ba kane ka seng kan ai ka jingshakri ia ka jaidbynriew, hynrei ha dien ba u la don ha poh jong ka seng ka long da khongpong bad kane ka la pynlong ia u ban shim ia kane ka rai ban mih noh na ka UDP ong ki thymmei khubor.
Kum u MLA ba don ka jingiohi jngai na ka bynta ka ri bad ka jaidbynriew u la leit kylleng ka Ri Khasi ban ialap paidbah ia ka “Clean Politic” bad kane ka la rung ha ka jingmud jingpyrkhat jong ki paidbah hynrei na ka liang jong ka seng UDP kan shym la ai ka jingkyrshan ia u ha kane ka bynta.(SP News)
