Shillong, Iaiong 14: Ka sorkar Meghalaya haduh mynta ka la ai 16 tylli ki mining lease sha ki khat hynriew tylli ki kompeny bapher bapher na ka bynta ban tih ia u Mawshun na kane ka jylla Meghalaya. Na kine ki kompeny 14 tylli kila ioh por tang arphew snem katba ka ar tylli kiwei pat ki la ioh haduh 30 snem, kane ka long katkum jingthoh kiba la don bad sorkar jylla.
Na kine ki company baroh kaba la trei slem eh ha kane ka jylla ka dei ka Kommorrah Limestone Mining Company Private Limited ha kaba ka mining lease jong kane ka company kan kut noh ha ka 26 tarik jong u bnai jylliew mynta u snem. Kane ka Company ka don ia ka jaka jong ka 240.55 hecter ha ka thain Sohbar.
Ha kane ka jingai mining lease ka sorkar Meghalaya ka la por kyrpang ia ka M/S JUD CEMENT LTD. Bad iaka Lafarge Umiam Mining Pvt.Ltd. Kine ki ar tylli ki company ki ioh mar 30 snem katba kiwei ki ioh tang arphew snem.
Ka Mawmluh Cherra Cement Ltd. Kaba dei ka company jong ka sorkar kane ruh ka ioh ia ka mining lease kaba tang arphew snem. Katkum ki khubor kiba la lah ban ioh la iatyhuh ba haduh mynta ka sorkar Meghalaya ka dang ai ia ki mining lease tang na ka bynta ki company cement kia pyndon kam ia u Mawshun.(SP News)
