Shillong, Iaiong 28: Ka Khasi Students’ Union South West Khasi Hills District ka pynpaw ia ka jingsngewsih kaba khraw halor ka jingklhlad noh u Bah Trueman Rngaid u ba dei u nongai buid ai bor barim ia ka seng KSU.
Na ka liang jong ka KSU ka shim u Bah Trueman Rngaid u dei u riew ieit ri ba shemphang, u riewialeh, u nongaibuit ai bor iaki samla, u long run u nongthoh kot bad u Myllung ka Jaitbynriew. U Bah True u don ka jingiadei ba jan bha bad ka KSU South West Khasi Hills District naduh ba la seng ia ka ha u snem 2002. U la long kum u nongaibuit jongka KSU South West Khasi Hills District naduh u snem 2002 haduh u snem 2013.
Ka KSU South West Khasi Hills District, ha u snem 2010 ka la ioh ban pyllait paitbah iaka Kot sah kynmaw ” U Wickliffe Syiem” u nongialeh laitluid bym lah pyndem ” ha kaba dei ma u uba la tih bniah bad thoh ia kane ka khana pateng jongka jingialeh u syiem Wickliffe. Ka Seng ka niewtang run ia u, kum uwei na ki myllung uba la thoh iaka jingrwai “Ka Shynkhan ki riew ieit Ri” ka jingrwai kaba la ktik bad pynphalang ia ka jingim u riew ieij ba kum ma u hi, ha kaba la tynsat lang ia kane ha ka thup jingrwai “Ka Nakra ki sangot ” kaba ngi la pyllait paitbah ha u snem 2012.
U Bah True u la long kum u nongpyrsad pynrhem ia u saihon ka jingieit ri ha kiba bun dkhot jong ka seng bad ki samla ialeh jongka Jaitbynriew. U dei ruh u briew ba stad ba shemphang bad u nongkren ba tbit ba pynpar niangkhriat ia ki nongsngap ha ka por ba u ju ialap halor ka kyrdan jongka Jaitbynriew khamtam hapdeng ki jingshah thombor bad shah klun tylli iaki hok longtrai ka jaitbynriew haka sorkar India.
Um dei tang u nongaibuit hynrei u long ruh kum u nonghikai kumno ba ngin ieit bad niewkor ia ka ri bad ka Jaitbynriew. Ka kyntien symboh ksiar kaba kongsan eh haduh ba un da khlad kaba u ju kren man ka por ka long ba “Ki longdien kin tip ba u Blei um shym la thaw tang ia u Negro, American, China hynrei u la ai la ka bynta bynta iangi ba ngin pynneh ia ka burom jong u ha la kajong kajong ka jaitbynriew.
U juban bad pynsngewthuh shaphang kaei ka ri ha kaba u la ong ba ” Ka ri kadei ka khyndew ka shiap bad lada ngi ieit ia ka Ri Khasi ngi dei ban sumar ia kane ka khyndew ne ka Ri ba kan nym syntuid noh sha ka kti ki mynder” U ju kylli ruh shaphang kaei ka jaitbynriew? ha kaba u la ong ba “Ka jaitbynriew ka dei ka snam bad lada ngi ieit ia ka jaitbynriew Khasi ngi dei ban sumar ba ka snam khasi kan nym dam noh na kane ka sla pyrthei “.
Kine ki dei ki jingkren jinghikai jong u ha man ba don ki jingialang khamtam haki nongialam jong ka seng. U la long ruh kum uwei ma shipai ba shlur bad ba ha syndah jong u ma Hopingstone Lyngdoh bam kwai ha dwar u Blei ha ka jingialeh Hills state ha ki por ba u dang khie samla bad ruh kum u paralok ba ha syndah bad u pa’iem wickliffe ha kaba u ju leit kai borabor bad u hangtei Rajai Bangladesh ha ki por ba u paiem Wickliffe u dang dang khlain.
Ka Seng ka tip shai ba u thylliej un nym lah shuh ban batai bad ka sia kan nym lah shuh ban pruid dak naba ki kam jongu ki long radbah bha ha kaba ka spah ka hajar kan nym lah shuh ban dang iahap tara bad ka synniang ba khraw jongu ba u la ai sha ka jaitbynriew.
Ka jingduh noh ia une u radbah ka Jaitbynriew ka long ka jingduh nong bakhraw ym tang iaka ing ka sem hynrei khamtam eh iangi ka seng kaba ngi dang khmih lynti shibun ia ki jingai buit ai mynsiem na I. Ngim lah shuh ban dang Siew kylliang hynrei tang ka mynsiem sngewnguh bad ka duwai ka phirat ba un ioh ka jingjahthait bymjukut haki ksang ‘ti u nongbuh nongthaw.
Ka seng KSU ka phah ia Kane ka jingsngewnguh jing sngewkitram bad ka kyrwoh sngewlem shaphi ruh kum ka ing ka sem ryngkat ki jingduwai ba phin ioh jingtngen ha kaba kum kane ka por jongka jingsngewsih kthang. Watla hapdeng kum kane ka shaiong ngain iangi kum ka seng hynrei ngi khmih lynti ba na ka syngkai jongu kan nang iai pynmih iaki soh jingkyrmen ha ki pateng ba shongprah shongshang jongka Jaitbynriew u Hynniewtrep Hynniewskum
” Ka kham bha ia u briew ban kham lyngkot ka sngi jongu ryngkat ka synniang ba khraw iaka Jaitbynriew ban iaka im tymmen shongprah bad ka jingim ba lehnohei. Ka seng ka sngewdei ban niew ba une u radbah u la pyndep pura iala ka kamram kum u riew ialeh uba ka jaitbynriew ka la pynkha. Kane ka long katkum ka kyrwoh kaba la phah na ka ophis jong ka KSU South West khasi Hills, Mawkyrwat lyngba u samla Jiedskhem Nongsiej, General Secretary, KSU South West Khasi Hills District.
