Wapungskur, Jylliew 02: Ka Dorbar Dong Moopynieiñ, Wapungskur, East Jaiñtia Hills District ha kane ka sngi saitjain ka la pynkup burom ïa u MDC ka 22-Musniang-Ryngad Constituency u ma Phasmon Dkhar, uba long ruh u local MDC jong ka, uba la jop ha ka sien kaba ar mynta na katei ka constituency.
Ia katei ka programme pynkup burom la pynlong ha hall ka Moopynieiñ LP School, ha ka jingïadon lang u Waheh Shnong ka Wapungskur lem bad kiwei ki nongkitkam ka Dorbar Shnong Wapungskur bad ruh ki nongkitkam jong ka Dorbar Dong Moopynieiñ, ka seiñ Manbei jong ka dong, ka seiñ MSCSO jong ka dong, ki Tymmen Basan jong ka Balang Presbyterian Wapung bad ki nongshong dong.
Ïa ka jingïalang la pynïaid da u ma C. K. Ryngkhlem, Chairman Dorbar Dong Moopynieiñ. U ma Damewanhi Rymbai, Secretary ka Dong haba kren ia ki kyntien lamphrang u la pynsngew ba u MDC u la ai haduh kumba duna 15 lak sha ki kam pynroi kiba bun jong ka Dong lyngba ki Scheme na ka JHADC bad na ka pla lajong ha kine ki san snem ba la dep, bad u la ai ruh ia ka memorandum sha utei u MDC ban pan jingiarap biang ha kaba iadei bad ka Community Hall jong ka Dong.
Ka kong Phaidlimon Siangshai, Secretary jong ka seiñ Manbei jong ka Dong, ha ka jingkren jong ka, ka la kyntu ia u MDC ban shakri hok ia ka kam kaba la shaniah ha u da ki paidbah ka constituency na ka bynta ka Jaidbynriew, da ka mynsiem sngewrit bad ka jingbym leh shiliang, bad ruh ban iasaid ia ki jingeh bad ban thaw ain ha JHADC na ka bynta ban iada ia ka Jaidbynriew rit paid bad culture jong ka Jaidbynriew Jaintia.
U ma Satly Ryngkhlem, Waheh Shnong u la pynpaw ia ka jingsngewnguh ia ka Dorbar Dong ha kaba ka la lah ban pynlong ia katei ka programme pynkup burom ia u MDC bad u la pynpaw ruh ba ka Dong Moopyniein kadei ka Dong kaba kiew bha ha baroh ki liang hapoh ka Shnong Wapungskur lyngba ki nongialam,kiba mynta bad kiba mynshwa, kiba trei ha ryngkat bad u MDC na ka bynta ban wanrah ia ki kam pynroi bad kiwei kiwei ki bynta hapoh ka dong Moopyniein bad ka shnong Wapungskur hi baroh kawei.
U ma Phasmon Dkhar, MDC u la pynpaw ba katei ka programme pynkup burom ia u ka long kaba kyrpang bha ha ka jingim jong u bad ruh kan ai mynsien shuh shuh ia u ban shakri ia ki paidbah jong ka Constituency bad ka Jaintia Hills hi baroh kawei lyngba ka JHADC na ka bynta ban iada ia ka Jaidbynriew Jaintia.
“Ka jingjop jong nga kadei ka jingjop jong phi ki paidbah ka constituency bad nga kyntu iaphi baroh uwei pa uwei ban pynsngew ia nga ia ki jingeh bad ki jingai jingmut jong phi lyngba ki nongialam ka dong jong phi ban wanrah ia ka roi ka par bad ban iasaid ia ki jingeh bad ban iada ia ka Ri Jaintia bad ka Jaidbynriew rit paid jong ngi, namar dei phi ki paidbah kiba control ia nga ha kane ka kam shakri paidbah kaba phi la pynshet mynta la ar samoi (term) kynthih.”, ong shuh shuh u ma Phasmon Dkhar.
Ha kane ka program, la pynkup burom ia utei u MDC da ka jain Rydia Tlem da u ma Damewanhi Rymbai, Secretary ka Dong, ka jingai syntiew da ka kong Samly Ryngkhlem, Chairperson ka Seiñ Manbei jong ka Dong, bad la ai ruh ia ka momentos da u ma NJ Ryngkhlem, Tymmen Basan ka Balang Wapung bad ex-Chairman ka Dong.
La ϊoh ruh ia ka jingkren na u ma Shaniahskhem Dkhar, President MSCSO, bad ϊa ki kyntien pdiang na u ma H. U. Bang, Principal ka KB Memorial Secondary School Wapung, katba ϊa ki kyntien ai khublei la ai na u ma Reachingson Siangshai, Adviser jong ka MSCSO.
