Shillong, Naiwieng 16: U myntri rangbah ka jylla u Dr Mukul Sangma haba kren ha ka jingrakhe ia ka sngi National Press Day u la ong ba ki paidbah kidon ia ka hok ban tip ia kaei kaba ka sorkar ka leh na ka bynta jong ki,bad ki lad pathai khubor ki dei ki bynta ba longsan ba ki paidbah ki ioh jingtip.
U la ong ba ka jingdon ia ka ain Right To Information ka long ka jingkyrkhu ia ki paidbah namar lyngba kane ka ain ki lah ban pan jingshia na ka sorkar ia kaei kaba ka sorkar ka dei ban leh na ka bynta jong ki paidbah ka jylla.
Ha kane ka sngi u la ong ba ka jylla ka dang don kam ia ki lad pathai khubor ba kin ngam sha ki kyndong kynshrot jong ka jylla, U la ong ba don kam ia ka sorkar jylla ba kan pynlut shibun ka pisa ha ki kam pynroi na ka bynta ban kyntiew ia ka ioh ka jot jong ka jylla.
Ha ka ri synshar paidbah ka long kaba don kam ia ki lad pathia khubor namar dei lyngba jong ki ki paidbah ki ioh ia ka jingtip ia kaei kaba jia sdaw dong jong ka jylla bad khamtam ia kaei kaba ka sorkar ka leh na ka bynta jong ki paidbah. U la ong ba “ Nga sngewlyngoh ban iohi ba bun na ki paidbah kim tip is ki skhim kiba ka sorkar ka leh na ka bynta jong ki”
Ha kane ka sngi la pynbna paidbah ruh na ka liang jong ka sorkar ka la pynkiew ia ka dor jingpynbna kiba dei na ka sorkar, na ka bynta ka Press club ruh ka sorkar ka la ai ia ka jaka ban tei ia ka press club kaba biang na ka bynta ki jong don kam jong ki nongthoh khubor.
Ha ka por jan miet ka la don ka jingiakren halor ka phang ka bynta jong ki nongthoh khubor bad ka Election kaban sa wan ha ka jylla. Ha kane ka jingiakren ki la mih bun ki phang ha kaba ki nongthoh khubor shem jingeh shibun ban leh khamtam ia ki kot khubor kiba rit kiba mih na kane ka jylla Meghalaya.(SP News)
