Jowai, Jylliew 26: Ka Dorbar Grand Council of Chiefs (kaba kynthup ia Ka Dorbar Ki Khlieh Nongsynshar Ka Ri Hynniewtrep, Federation of Khasi States, Ka Dorbar Ki Dolloi, Ki Sirdarship) kaba la ia kynduh ban ia syllok ha ryngkat bad ki Dolloi, Lyngdoh, Pator, Rangbah Kur, bad ki dkhot Dorbar Elaka, ki Rangbah Shnong, ki Nongialam Seng Bhalang, ki Longkmie, Samla, ki Elaka Dolloi bad Sirdarship, ka thain Jaintia Hills mynta ka sngi ha kaba ia ka jingialang la pynlong ha hapoh office Village Court, Elaka Jowai, Loompyrdi, Iongpiah, Jowai hapoh ka jingpyniaid jong u Pa Chawas Lyngdoh, Dolloi Raliang & President Ka Dorbar Ki Dolloi, bad u Pa K Comet Rymbai, Dolloi Jowai, Secretary, Ka Dorbar Ki Dolloi.
Hadien ka jingiatai kaba la sani bha halor ka shithi na ka Ministry of Home Affairs, Sorkar India, kaba D.O. No. 9./10/2012 dated 18 July 2012, sha u Chief Secretary, Meghalaya, kaba pan jingmut halor ka Memorandum ba la phah da ka Dorbar sha ki bor Sorkar India ha u June 2012,la iakren ruh ia ka KHADC Village Administration Bill 2013- Ka jingpynbeit thymmai (Amendment) Sixth Schedule -Constitution Ri India bad ka Rai ka Dorbar 4 tarik June 2013, bad halor ka Dorbar kaba kyrpang ha ka 13 August 2013, hapoh Khasi National Dorbar Hall, ban kynmaw ka jingdap 65 snem ka jingsoi bad mynjur ka Sorkar India ia ka Instrument of Accession & Annexed Agreement ha 17 tarik August 1948, katei ka jingialang ka la pynpaw ia kine ki jingsngew harum:
Ki Rangbah Shnong bad ki katto katne ngut ki nongialam jong ki seng bhalang ka thain Jaintia hills kiba la poi ki la dap da ka jingkyndit ban tip ba ka don ka jingpyrkhat thymmai ia ka Sixth Schedule, bad ha kaba iadei bad ka Village Administration Bill ba la tyrwa da ka KHADC. Kiba bun ki la pynpaw ka jingsngew byniaw halor ka jingbym tip ki paidbah jong ka thain Jaintia Hills halor kine kiei kiei. Ki la kyntu ia u Bah John F Kharshiing ban ialeh shitom ban pynsangeh noh shwa shipor ia kitei ki jing pynbeit shipor ioh ba ki rung ki jingpynbeit thymmai kiban pyntlot pynban ia ki bor Dorbar Shnong, Raij bad Hima.
Na ka liang u Bah John F Kharshiing, Chairman, The Grand Council of Chiefs of Meghalaya, Chairman, Ka Dorbar ki Khlieh Nongsynshar Ka Ri Hynniewtrep, bad Spokesperson, Federation of Khasi States, u la pynshai ba ka por ka dawa ban ioh ia ka AIN Synshar Dorbar Shnong, Raij bad Dorbar Hima kaba shai khnang ba ki bor Sorkar kin ithuh ia ka iktiar, ka kyrdan jong ki Nongsynshar naduh Shnong haduh Hima. Bad ha kata ka jingpynkup bor ka wan ruh ka jingkitkhlieh lane ka jingbahkhlieh ha kaba ki Rangbah Shnong bad kiwei kiwei ki Khlieh Nongsynshar kin don ki AIN ki KYNDON (RULE) kiba shai ha kaba synshar bad bishar Shnong, Raij ne Hima. Ki kam ki long kiba khia bad ka kam ka dawa ia baroh ki Dorbar Shnong ha kane ka Ri Hynniewtrep ba kin shim khia ban ia pule bniah ia ki ain ki kyndon kiba la pynkhreh da ki bor KHADC, bad ia kaba khlem artatien ki bor Jaintia Hills Autonomous District Council (JHADC) kin sa pynbud bad pynjari ia ka juh ka AIN.
Katei ka jingialang ka la pynpaw ia ka jingsngew pyrshah kaba jur halor ka jingtyrwa ban bsuh ia ki dur Village Development Council (VDC) halor katei ka BILL namar ki la pynpaw ba ka long kum ka dur PANCHAYAT haba la plie lad ban rung ki bar jylla lyngba kitei ki VDC. Ki la kyntu jur ia u Bah John F Kharshiing, ba un ialeh katba lah ban pynsngewthuh ia ki bor District Council bad Sorkar ba kim dei ban thaw lane tyrwa ia kum kitei ki Development Council kiban kylla long ar tylli ki bor hapoh kawei ka Shnong. Ki la pynpaw ba kitei ki kam VDC kumba la kdew ha katei ka BILL kiba bun hi baroh ki dei kiba pyntrei haduh kine ki sngi da ki Dorbar Shnong.
Katei ka jingiasyllok ka la shim ia ka rai ban kyrpad ia u Bah John F Kharshiing, Chairman, Ka Dorbar Ki Khlieh Nongsynshar ban wan pynshai biang sha ka jingialang kaba la pynbeit ban long ha ka 16 tarik July 2013, ha kaba yn ia don lang baroh ki Dolloi, Lyngdoh, Pator, Rangbah Kur, bad ki dkhot Dorbar Elaka, ki Rangbah Shnong, ki Nongialam Seng Bhalang, ki Longkmie, Samla, ki Elaka Dolloi bad Sirdarship, ka thain Jaintia Hills, bad la ai bor ha u President bad Secretary, Ka Dorbar Ki Dolloi ban phah notice sha baroh ki Nongsynshar Shnong jong ka thain Jaintia Hills khnang ba kin nym long ha kaba kyndit haba wan katei ka AIN kaba la khreh ban wan hashen. La rai ban kyrpad ia u Bah John F Kharshiing ban ia kren bad ki bor JHADC khnang ba ki paidbah jong ka thain Jaintia Hills kin ia shai kaei kaba kitei ki rangbah na ka EC JHADC ki la leh lane pynkhreh halor ka jingpynbeit thymmai jong ka Sixth Schedule, kum ba la iohi na ki kot KHADC ba la sam da u Bah John Kharshiing.
Kiba la ia kren bad kiba la ia don lang ki long u Dolloi Jowai, Dolloi Raliang, Dolloi Amwi, Dolloi Sutnga, Khun Dolloi Nongjngi, Secretary Raij Buam, Lyngdoh Raij Buam, Secretary Elaka Shilliang Mynta, Secretary Elaka Sutnga, u Sirdar Saipung, u Secretary, Ka Synjuk Nongsynshar Shnong, East Jaintia Hills, ki Nongialam bad ki nongkitkam Finance Secy, Jaintia Students Union, President AJYWO, General Secy, FKJGP, JH, FKJGP-Laskien, President HNYF West Jaintia Hills, Gen Secy, HNYF Raliang Circle, President MPUF, President HANM Jaintia Hills Dist, Vice-President Jaintia Hills Dist, KSU Laskien, KSU-Amlarem, ki Lyngdoh, Pator, bad ki Rangbah Shnong na ki Shnong bapher bapher jong ka thain Jaintia Hills.(SP News)
