Shillong, Risaw 09: U lat jong ka jylla Meghalaya u Satya Pal Malik mynta ka sngi u la phah ia ka khubor sngewlem sha ka kurim jong u myntri ka sorkar pdeng bala khlad ka Reena Paswan.
U Lat ka jylla Meghalaya u la ong ba u dap da ka jingsngewsih bad sngew kyndit ban tip halor ka jingkhlad kyndit jong u myntri ka sorkar pdeng u Ram Vilas Paswan, ka jingkhlad jong u ka long ka jingduh ia ka Ri baroh kawei.
U Lat ka jylla u la ong ba kum u nongmih khmat paidbah sha iing dorbar baroh Parliament jong ka Ri India u la noh syniang shibun kiei kiei ha kaba ki briew jong ka Ri kin sah kynmaw, na ka liang jong u Lat u phah ia kane ka khubor sngewlem bad to u trai kynrad un ai ka jingjah thiat bymjuh kud ia ka mynsiem kaba la khlad noh.
