Shillong, Risaw 23: U bah Sanbor Shullai MLA jong ka BJP na ka 19-Shillong South Konstitwensi mynta ka sngi la phah da ka jingthoh sha u myntri kam poh iing ka sorkar pdeng ban ong ba dei ban pynbeit noh ia ki jingiakjia pud hapdeng ki jylla North East shuwa u snem 2021.
Hab kren ia ka jylla Meghalaya bad Assam u bah Sanbor, ha ka shithi kaba u la phah mynta ka sngi u la kdewn ba ki don bun tylli ki jaka kiba don ha pdeng ka jingiaknieh hapdeng ka jylla Assam bad Meghalaya bad kane kala wan rah ia shibun ki jingeh ha khappud bad kala buh jingeh ruh ban pyntrei ia ki kam pynroi.
La ong ba ki briew jong ka jylla Meghalaya ki dei ki briew kiba kwah ia ka shong suk shong sian hynrei kane ka jingiakjia pud kala ktah ia ka shong suk shongsain ha ka jylla bad kala kala pynthud ruh ia ka shong suk shong sain.
U bah Sanbor u la kdew ha ka shithi ba katkum rai jong ka party BJP ha Delhi ka long ba ia ki jingiakjia pud ha ki jylla ka dong shatei lam mih ngi jong ka Ri India dei ban pynbeit noh baroh shuwa u snem 2021, dei halor kane ka rai ba u kwah ban ka sorkar pdeng kan tuklar ban pynbeit noh ia u bud u sam ha pdeng ka jylla Meghalaya bad Assam.
Ka jingshim ia ka rai na ka liang jong ka party ban pynbeit noh ia ka jingiakjia pud ha ki jylla ka North East ka dei ka riang ba biang bad baroh ki pdiang ia kane bad lada ka sorkar pdeng ka shim khia ia kane kan iarap shibun ban kyntiew ia ka party ha kane ka thain shatei lam mih ngi bad kane ka pynlong ban ioh ia ka jingshaniah ki paidbah kane ka thain.
