Shillong, Nohprah 01: U bah Titosstarwell Chyne Chief executive Member jong ka KHADC mynta ka sngi ryngkat bad ki khlieh nongsynshar ka Sohra Civil Sub Division kila leit ban ia kynduh ia u myntri rangbah ka jylla ban ia kren halor ka jinghiar ka ioh ka kot jong ka tei ka thain.
Haba kren ha ki lat pathai khubor ha dien ka jingiakynduh ia u myntri rangbah ka jylla u Conrad K Sangma la ong ba ka jingiakren ka long ha kiba bun ki liang, kum ka jingkhang tih dewiong, ha kane ka liang u myntri rangbah u la ong ba la shah ban tih dewiong tang ba don kam ban pan ia ka mining lease.
Halor kane ka sorkar kan sa ai jinghikai ia ki paidbah ka thain Sohra ban sngewthuh kumno ban pan ia kane ka jingbit, namar kane ka jingtih dewiong mynta kan long noh katkum ka juk kaba thymmai ym kum mynshuwa.
Haba phai sha ka kam jngohkai purthei u myntri rangbah ka jylla u la pynsngew ba ka sorkar jylla kan pynlut kham bun ka pisa sha ki thain Sohra, la iathuh ba ka pisa ka don kumba T.700 klur bad kaba bun kan leit sha Sohra ym tang ban pynbha ia ka surok bah hynrei wat ia ki surok shnong ruh kum juh.
Ha kane ka jingiakynduh na ka liang jong ki nongialam shnong kila pynpaw ha khmat jong u myntri rangbah ba dei ban pyndep noh ia ka NIT bad kila ia kren ruh ia ka District , haba ia dei bad ka District u myntri rangbah u la ong haba ia dei bad ka District ki don ruh kiwei kiwei kiba kwah ia kaba ka sorkar ka hap ban bishar bniah shuwa ban shim ia ka rai.
Haba ia dei bad ka MCCL la ong ba kin dang ia shong biang ban ia kren bniah ia kane ka kam, haba ia dei bad ka tulop kaba la sha 15 bnai ka sorkar kan sa leh ei ei shuwa ka Khrsitmas. La ka sorkar kan pynim biang ia ka ne kan leh ha kano ka rukom ruh kin sa ia kynduh kyrpang halor kane.
Na ka liang jong u bah Titosstarwell Chyne MDC jong katei ka jaka ba dei ruh u CEM jong ka KHADC, u la kynnoh ba ka jingduh ka MCCL ka dei na ka jingbakla ka jingpyniaid ia ka naduh mynshuwa.
