Liarbang, Nohprah 13: Da ki bun bun snem ka tnad shna surok jong ka jylla Meghalaya kam shym la maramot ia ka surok na Liarbang shaduh Sabuda kaba dei ka surok ba da ki phew tylli ki shnong ki hap ban iaid na kane ka surok ban wan sha Shillong.
Kane ka surok baroh shilynter ka hap hapoh Mawhati konstitwensi, ha shilynter kane ka surok kam don shuh kata ka rong kala shu kylla surok khyndew, ki nongshong shnong ki pynpaw ia ka jingsngewdiaw ba ka sorkar kam shym la peit lem ia kane ka surok.
Haba u SP News Agency u la poi Sha katei ka thain la shem shisha ba kane ka surok kaba pyniasoh bad ka jylla Assam ha Sabuda kala long kum ka surok khyndew ha baroh shilynter bad ki paid bah nongshong shnong ki angnud ba ka sorkar kan phai khmat lem Sha katei ka thain ha kaba iadei bad ka surok kaba la shah ieh bun snem mynta.
Ki briew ba shong ha katei ka thain ki dei ki nongrep bad ka jingsniew palat ka surok kala pynlong ba ka shitom ha ka kitna ka bah ban pynpoi ia ki marrep namar kala kiew palat kabai kali.
