Shillong, Nohprah 23: Ka HYC Nongmensong unit mynta ka sngi hapoh ka jingialam u Samla Swendar Kharkrang ha ryngkat ka jingsynran lang u Bah Donboklang Kharlyngdoh Vice President sengkmie, ka la rakhe Pre Christmas da ka jingiarap ia ka iing khunswet kaba don ha Lumshyiap, Langkyrding.
Katei ka jaka Ri khunswet kaba don kumba 67 ngut ki khynnah kadei kaba la tip kyrteng kum ka God’s Dream Children Home ba la peit da u Pastor Kross jong ka Now Generation outreach.
Ka Jingiarap ba ka HYC Nongmensong unit ka la kner ha kane ka step ka long da u Khaw, Shini, Dai, Umphniang, Sanitizer bad ki blanket kumjuh ruh ka song Pisa kaba khyndiat eh.
Ha kane ka step la pyniaid ia ka jingialang ba lyngkot, da u Vice President Nongmensong unit Samla Lamonte Kharlyngdoh. Kiba ai jingkren ki long Bah Swendar Kharkrang Bah Donboklang Kharlyngdoh bad U pastor Kross.
U Bah Swendar Kharkrang u la ong ba ngi la jied khnang ia kum kane ka Sngi ban rakhe ia ka Sngi Christmas da kaba noh kine ki jingiarap barit eh sha phi ki khunswet, ngi ngeit ba kine ki jingiarap jong ngi, lyngba ka kti basbun phin pdiang da ka jingkmen.
U Bah Donboklang Kharlyngdoh haba ai jingkren u la pyrto ia u Pastor Kross uba la lah ban ri ban sumar ia kine ki 67 ngut ki khynnah, u la ong bad pyniasyriem ba la long thik kum ka shnong rit ha nongkyndong haba ngi wan ban jngoh ia kane ka jaka.
U Bah Donboklang u la pynpaw ruh ka jinglyngngoh bad kat kine ki khynnah u Pastor u la ri la sumar khlem don kano kano ka jingiarap na ka sorkar, bad la kyrshan hi tang da ki para bangeit bad ki paralok, kane hi ka pynpaw ba ka mynsiem iarap ka don ha u Pastor.
U la kyntu ruh ia ki khynnah ba kin long borabor kiba tip Sngi bad Minot ha ki jingpule, haba phi Don hangne, jingai na la kiba ha iing ha sem.
Haba ai jingkren u Pastor Kross, u la pynpaw ka jingaikhublei ia ka HYC Nongmensong unit bad ia ka seng baroh kawei ba ka la wan ban iarap ha kane ka step, u la buh ruh ka jingduwai bad kyrkhu kyrdoh ia ka seng, khamtam ia kane ka jingrakhe Christmas mynta u snem .
La ioh ruh ka jingrwai Christmas na ki hep kiba rit jong ka God’s Dream Children Home ha kane ka step. Kane ka long katkum ka kyrwoh ba la pyllait da u Publicity secretary Nongmensong unit.
