Shillong, Naitung 07: U Bah Kitboklang Nongphlang u wei na ki khun samla jong ka Ri Khasi u ba don ha ka seng FKJGP u la ioh pdiang ia ka National Youth Awards na ka kti jong u president jong ka Ri India U Pranap Mukherjee ha ka jingialang kaba la long ha Rashtrapati Bhawan, New Delhi.
Na ka liang jong ka seng FKJGP ka pynpaw ba ka dap da ka jingsngew kmen ban iohi ba u wei na ki samla jong ka Ri u ioh ia kane ka khuh snam bad kane ka dei ka jop ia ia ka jaidbynriew khasi bad ia ka jylla hi baroh kawei ia kane ka khuh snam la ai da u president ha ka 4 tarik mynta u bnai.
Kane ka jing ioh Khusnam NATIONAL YOUTH AWARD jong u samla Kitboklang Nongphlang na u Pranab Mukherjee, President ka Ri India kadei ka burom kaba khraw ia ka Jaitbynriew bad ka Jylla hi baroh kawei namar ka jingnoh synniang jong u sah ka imlang ka sahlang ha ka liang jong ka Health, National Integration bad Community Development kaba la pynlong wat ia ka sorkar kmie lyngba ka Ministry Youth Affairs & Sports, Govt. of India ban ai ia ka jingithuh kaba kyrpang ia utei u samla Nongialam uba la trei borbah ban wanrah shibun ki jing kylla ha ka imlang ka sahlang lyngba ki kam treimon sngewbha kiba u la ai ka jing shakri mynta la palat 12 snem.
Na ka liang jong ka FKJGP Upper Shillong Circle ha ryngkat ka Seng Samla Shnong Mawklot kim lah satia ban niewtang ia ki kam trei mon sngewbha bad ia ki jing noh synniang jong u Samla Kitboklang Nongphlang sha ka imlang ka sahlang bad sha ka Jylla hi baroh kawei khamtam eh uba la long kum u Ksaikhmat uba la Pruid Dak ia ka State Youth Policy ha ka Jylla.
Ha kajuh ka por na ka liang jong ka FKJGP Upper Shillong Circle bad ka Seng Samla Shnong Mawklot kim lah satia khlem da pynpaw ka jing sngew nguh kaba khraw ia ki Nongialam jong ka Dorbar Shnong Mawklot, Mawklot Sports Social & Cultural Club, Seng Samla Mawkriah East, Seng Longkmie Mawkriah East, Bah Clifford Nengnong Nongialam jong ka National People’s Party (NPP), FKJGP Mawklot Unit, FKJGP Mawkriah Unit kiba la wan shaw kyrpang ia u Samla Kitboklang Nongphlang ha ka 5th July 2013 naduh Guwahati Airport.
kumjuh ruh ia ki Nongialam jong ka FKJGP East Khasi Hills District hapoh ka jingialam jong U Bah Elton.C.Warjri President FKJGP East Khasi Hills District, FKJGP Mawlai Circle, FKJGP Mawkhar Circle, FKJGP Malki Circle, FKJGP Jaiaw Circle kiba la pdiang burom ka katei ka sngi naduh Banalari World Cars, ki Nongialam jong ka Hima Mylliem Youth Welfare Organisation, Mylliem Lum Sports Association, United Democratic Party (UDP) Mylliem Circle, Ki Paidbah jong ka Shnong Lummawbah, Lawsohtun bad ki paidbah jong ka thain Upper Shillong hi baroh kawei kiba la iamih ryntih na ki shnong ki Thaw ban ia pdiang burom ha shi lynter jong ka suroh bah Upper Shillong naduh lad Lummawbah ter ter kum shi bynta ban ai mynsiem shuh shuh ia u Samla Kitboklang Nongphlang ba un nang lah ban ai ka jing shakri kaba kham janai shuh shuh ha ki sngi bad ki por ki ban dang wan baroh.(SP News)
