Shillong, Lber 12: U Myntri ba dei peit ia ka tnad pule puthi jong ka jylla u bah Lahkmen Rymbui haba jubab ia ka jingkylli kaba la wan rah da u bah George B Lyngdoh MLA ha kaba ia dei bad ka Arrear ki nonghikai la ong ba kaba dang sah ka long T.51.15 klur.
Kane ka arrear ka dei namar ba la pynkiew ia ka tulop jong ki nonghikai SSA naduh ka 1st Iaiong 2016 bad ka arrear baroh ka long T.89.51 klur, na katei ka sorkar kala siew T.38.35 klur ia kane la siew ha u snem 2018, kumta kaba sah ka long sa T.51.15 klur.
Haba jubab ia ki jingkylli bynrap na liang jong u myntri u la ong ba ka sorkar ka dang ialeh ban wat kilat ki lynti kumno ban ioh ban siew pyndep ia kane kaba dang sah ka arrear jong ki nonghikai SSA.
U Myntri ba dei peit ia ka tnad khlaw u James K Sangma haba jubab ia ka jingkylli jong u bah Syntar Klas Sunn ha kaba ia dei bad ka Meghalaya State pollution Control Board, na ka liang jong u myntri u la ong ba ka dei ka jingshisha ba la seng ia ka MSPCB ban ia jingmut ia ka sorkar.
Na ka liang jong u myntri u la jubab ruh ba ka jingai jingmut jong ka MSPCB ia ka sorkar, ka shong ha ka sorkar la kan pdiang ne em ia ka jingai jingmut, kam mut ba ka sorkar ka hap ban pdiang.
