Williamnagar Naitung 19: Ki pulit jong ka East Garo Hills mynta ka sngi ha dien ba ki la ioh ia ka jingtip kaba thikna ba ka don ka jaka rieh jong u Area Commander u Jimmy Momin jong ka seng lehnoh GNLA, ki la leit sha katei ka jaka ia kaba la tip kum ka Bansamgre.
Na ka liang jong ki lehnoh haba kila iohi ia kane ka jingwan jong ki pulit kila sdang ban sait bad ki pulit ruh kila pynphai kylla,ka jingiakhun ka la neh slem naduh ka por 7 baje mynstep haduh ka por 10 baje mynstep.
Ha kane ka jingiasait u wei u dkhot jong ka seng GNLA u Plon M Sangma ia u ba la sien kyrteng Markus Lance u ba bat ha ka kyrdan corporal ha katei ka seng lehnoh u la kyllon ipa ha kane ka jingiakhun bad ki pulit.
Na katei ka ktem jong ka GNLA ki pulit ki la ioh ban kurup kawei ka AK-47 riffle bad lai tylli ki magazine, 148 tylli ki kuli kiba khlem pat pyndon kam, ka wei ka US .45 colt pistol kaba 17 round, ar tylli ki grenade, ar tylli ki wireless set bad san tylli ki ID Cards jong ki GNLA laioh na ka met jong u tei u ba iap.(SP News)
