Shillong, Nohprah 21: U Rev. GPL Gadew ryngkat u Retd Professor. SS Majaw, ha ka janmiet 21 tarik u Nohprah, 2021, ki la pyllait paidbah mar ar tylli ki kot na ki saw tylli ia kiba la thoh da u Dr A Jellingstar Lymba.
Kine ki saw tylli ki kynthup ia ki kot kiba la ai kyrteng – Mother: A root of generations, Ki Sawphew ha ka Bible, Ka tympan ki jingtip bad Ki jingai ba kordor jong ka Mariang la pyllait paidbah ha ka jingialang ha Conference Hall ka KJP Synod Sepngi, Mission Compound, Shillong.
Ha ka jingialang la ia don lang ruh da u Rev AC Lymba, Chairman Jingiaseng Samla KJP Synod Sepngi uba la pyniaid ia ka jingïalang bad uba dei ruh u hynmen jong u nongthoh kot, ka kmie, ka kurim, ki bahaïing lem kiwei pat nalor ki paralok ki parajor.
U Retd Professor SS Majaw haba kren ha ka jingialang u la ban jur ba kum ki nongthoh kot kim dei ban long ki nongpynklumar shnong da ki jingthoh jong ki. “Kum ki nongthoh kot kim pat ai ka jaka kaba biang ia u dak thoh ‘ï’ bad ‘ng’ bad kane kan pynklumar ia ki pateng ban wan”, u la ong.
Da kaba kdew ba ka Jaidbynriew kan ïap noh lada ka tip briew tip Blei kan jah noh, u la ong, “Kaei kaei kaba la pynbiang nongrim ia ki dak thoh Khasi da u Rev Thomas Jones ka dei kaba la biang hynrei ban thep ia u dak thoh ‘C’ ha ka thoh ka tar Khasi kam iahap satia”, u la ong.
