Shillong, Rymphang 17: U Myntri Rangbah ka jylla u Cornad K Sangma ha ka sng palei u la plie ia ka jaka pule nos kaba nyngkong eh ha West Khasi Hills District “GNM Nursing School” ha Nongstoin, ha kaba u MLA kane ka jaka u bah Macmillan Byrsat u la don lang ryngkat ki briew ka tnad ka koit ka khiah na ka District.
U Mytnri Rangbah ka jylla u Cornad K Sangma u la ai khublei ia ka tnad ka koit ka khiah kiba la trei shitom ha kaba la lah ban ioh plie ia kane ka jaka pule Nos hapoh ka West Khasi Hills District, ka jingbym lah ban plie ia kane ka jaka pule ka long ba ka don noh kane ka khlam COVID-19 ha kine ki ar snem kiba la leit.
Da ka jingplie ia kane ka jaka pule mynta ka sngi la lah ban pynurlong ia ka jingangnud jong ki paidbah ka thain ban ai ka jingsumar kaba kham bha ha ka liang ka koit ka khiah namar kumba ka long mynta ka jylla ka don ka jingkyrduh briew ha ka liang jong ki briew ha ka tnad ka koit ka khiah bad ka jingdon ia ki jaka ai jingsumar.
Kane jingwan kane ka khlam COVID-19 kala pynlong ia ka sorkar ban kyndit ban iohi ba ka jylla ka don shibun ki jingduna ha ka liang ka koit ka khiah bad ka sorkar mynta kala shim khia ia kane ka bynta ban ialeh ban pynbiang ia ki lat jingsumar ia ki paidbah ha ka jylla ia kaba ka jylla ka hap ban pynlut shibun ha kane ka liang.
Ha kane ka jingialang paidbah haba plie ia katei ka jaka ai jinghikai ha Nongpoh, East Garo Hills, kane kan iarap ban pynbiang ia ki jingdon kam ha ka koit ka khiah ha ka jylla baroh kawei, ka sorkar kan ialeh ban buh 600 tylli ki jaka ai jingsumar ha kane ka jylla wat ha pdeng ka jingduna kiba bun.
U Cornad la pyntip ruh ba ka sorkar kala ai pisa T.280 klur ban buh ia ki “Medical Skill Centre” ha ka jylla na ka tnad ba dei peit ia ki rit paid jong ka Ri India, kumba ka long mytna ka jingkiew ha kaba pynrung kyrteng ha ka MHIS bad ka jylla kan don 485 tylli ki jaka ai jingsumar.
U Myntri rangbah ka jylla u la pynpaw ruh ia ka jingsngewsih ban iohi ia ka jingkhlad ki kmie ha ka por kha bad ka jingkhlad ki khunlung ba dang kha ha kane ka jylla, u myntri rangbah la ong ba don kam ia ia treilang ban weng ia kane ka jingeh, u kyntu ia ki nos ba kin shim ia kane ka kam da ka jingkit khlieh bad ba kin trei ia kane ka kam da ka jingieit.
