Shillong, Jymmang 10: U Myntri Rangbah ka jylla u Conrad K Sangma mynta ka sngi u la ong ba la bthah ia ka tnad pule ba kan bishar bniah ha kaba ia dei bad ka jingdawa jong ki nonghikai ban pynkiew tulop bad ynda kila dep ban peit bniah ynsa ia kynduh bad ki ophisar ka tnad pla pisa ha dien ba la ioh ia ka jingkhein kin sa khot ia kren ia ki nonghikai.
U Myntri rangbah u la ong ba u la ia kynduh bad ki nongialam jong ki nonghikai Adhok la bun sien bad la pynsngew ia kaei kaba ka sorkar ka don ban leh, hynrei kane ka ktah ia shibun ka pisa kam dei tang da ki klur tyngka hynrei kan long palat spah klur dei na kane ka daw ba ka sorkar ka hap ban da peit bniah bha.
Kane ka jingdawa kam dei kaba thymmai, namar ka jingeh kaba ka sorkar ka ia kynduh namar kane ka ktah ruh ia bun kiwei ki bynta, lada shim rai kan ktah ruh ia kiwei kiwei ki kam bad u myntri rangbah u la pynpaw ba u kwah ban iohi ban leh ei ei halor kane ka bynta bad mynta u la bthah ia ka tnad pule bad ka tnad pla pisa ban pynbeit ia kane ka kam.
U mytnri rangbah u la ong ba ha dien ba u la dep ban ia kren bad ki ophisar un sa khot ia kren ia ki nonghikai ha kaba ia dei bad kane ka bynta namar kumba ka logn mynta ki dang pynkhreh bad ngeit ba yn sa lah ban leh ei ei ha kaba ia dei bad kane ka jingdawa ki nonghikai.
