Shillong, Jylliew 24: Ki samla ka jylla Meghalaya kiba la apply ia ka kam shipai kaba la pynlong ha u snem 2021 kiba la pyndep ia ka jingiamareh, ka jingpeit bniah ia ka koit ka khiah bad kiba ap sa tang ban thoh ia ka elsamin mynta ka sngi kila mih paid pynpaw a ka jingpyrshah ba ka sorkar pdeng kaba la ialam da ka BJP kala pynduh bad wanrah pynban da ka “Agneepath”.
Katkum ka jingiathuh jong kine ki samla kiba la dep ban pyndep ia ki jingiamareh, ka jingpeit bniah ia ka koit ka khiah, la ong ba ha Meghalaya kiba la pyndep ia kitei ki don kumba 700 ngut ei ei bad kine baroh ki ap ban thoh ia ka eksamin kaba la tip kum ka “Common Entrance Exam”.
Sa shisien ban pynpaw ia ka jingpyrshah ia kane ka jingleh jong ka sorkar pdeng kine ki samla na kane ka jylla Meghalaya kila ia lum ha khmat jong u mot Kiang Nangbah ban pynpaw ia ka jingsngewsih jong ki da kaba rah ia ki jingthoh kaba ong ba ki kwah ban toh ia ka CEE eksam.
Bun na kine ki samla kila pynpaw ba kimd on ei ei ban ong ba ka jingkwah ka sorkar pdeng ban wanrah ia kane ka Agneepath Skhim, hynrei ka sorkar pdeng ka dei ban sngewthuh ba ka dei ban pyndep shuwa ia kane ka CEE eksam kaba ki samla kylleng ka Ri India kila dang khmih lynti ban thoh namar kila pyndep ia ka jingiamareh bad ia ka jingpeit bniah ia ka koit ka khiah ka met ka jong ki.
Kine ki samla kila pan ia ka jingbit na ophis jong ka Deputy Commissioner ban iaid na ka ophis jong ka jaka pynrung kam shipai kaba don syndah ka ophis jong ka Cantonment Board hynrei kim shym la ioh ia ka jingbit, ka jingbit ba ki ioh ka long ban iaid na Mot Kiang Nagbah sha Madan Malki hynrei kibor ba dei peit na katei ka madan ki khlem ai jingbit.
Ha kane ka sngi kawei ka Magistrate kong B Lyngdoh kala wan ban ia kynduh ia ki samla kiba la ialum ha jan u mot jong u Kiang Nangbah ban ia kren bad kine ki samla kiba la ialum ha katei ka jaka.
