Shillong, Risaw 13: Ka jylla Meghalaya ka la sakhi ka jingpang khieshoh kaba la tip kim ka jingpang Dengue haka ba 44 ngut ki briew kila ioh pang naduh 3 tarik Risaw 2023.
Kane ka jingpang ka la shim ruh ia ka jingim jong uwei u rangbah na ka thain Tura West Garo Hills hadien ba une u rangbah u la ioh pang brain hemorrhage namar ba la jur palat ka jingpang Dengue.
Ia kane la pynthikna da ka myntri ka tnat ka koit ka khiah ka kong Ampareen Lyngdoh ba ka la iathuh ba kane ka jingpang khieshoh (Dengue) ka la pur tang ha ki bynta ka them rithor jong ka thain Garo Hills.
Haba kren shaki lad pathai khubor ka kong Ampareen ka la iathuh ba na naduh ka 3 tarik Risaw, kane ka jingpang ka la sdang pur ha ki bynta ka Garo Hills. ka tnat ka koit ka khiah ka la dep ban eksamin haduh 77 ngut ki briew.
Shuh shuh ka kong Ampareen Lyngdoh ka la ong, Ka jingsdang pur kane ka jingpang khieshoh (Dengue) ka dei ba iabit na ki kynja pyrjong namar ka jingshlei um, ka jingkiew kynsan ka jingshit ha ki thain rithor ka Garo Hills hynrei ki paidbah kim dei ban syier mynsiem namar kane kam dei ka jait jingpang ba iabit para briew.
Ka kong Ampareen ka la kyntu ia ki paitbah ban shim khia da ka ba leh khuid lane da ka ba phah eksamin haki jaka sumar lada don jingshit kumjuh ruh da ka ba bud ryntih ia ki kyndon ba la bthah ka tnat ka koit ka khiah kaba la kdew shai ia ki lad jingiada na kane ka jingpang khieshoh (Dengue).
Kala iathuh ba ka tnat ka la bthah ia baroh ki jaka sumar ban ai ki lad jingsumar ia baroh kiba don ka jingpang ha ki thian Garo Hills.
Haba kylli hato kane ka jingpang ka pur ne em sha kiwei ki thain ka jylla, ka myntri ka tnat ka koit ka khiah ka la ong “Haduh mynta ia kane ka jingpang ka sakhi tang ha rithor ka thain Garo Hills bad la sngewthuh ba kane ka jingpang ka don tang ha ki jaka ba jur ka jingshit ka suinbneng. Hynrei na ka liang ka tnat ka koit ka khiah ka la pynkhreh ia ki lad jingiada bad mynta ka kynti kane ka jingpang ka la sdang hiar bha ha Garo Hills.
