Shillong, Risaw 16: Mynta ka sngi ka Dr. Mazel Ampareen Lyngdoh myntri ba dei peit ia ka tnad ka koit ka khiah jong ka sorkar jylla kala leit ban jngoh ia ka jaka ai jingsumar kaba don ha Nongmynsong.
Ha kane ka jingleit jurip ka myntri ka koit ka khiah kala shem ba kane ka jaka ai jingsumar jong ka sorkar ka don shibun ki jingduna ia kaba don kam ban pynbiang na ka bynta ka jingmyntoi jong ki paidbah katei ka thain.
Ha kane ka jingleit la synran lang da u MDC kane ka jaka u bah Fantin J Lakadong, ka Director tnad ka koit ka khiah jong ka jylla ka Dr. R Ally ka DM&HO Dr. Shakina Lyngdoh bad ki dkhot ka dorbar shnong kila ia don lang, ryngkat ki ASHA.
Kumba ka long ha baroh ki dong jong kane ka nongbah Shillong ka don kawei ka jingeh bad kata ka jingshah ktah ha u drok, ha ja juh ka rukom ha Nongmynsong ruh ki shnong ki ia kynduh ia kane ka juh ka jingeh ha kaba ia dei bad kam drok.
Kumba ka long mynta kane ka jaka ai jingsumar ka don ha Nongmynsong ka don ia ki nongtrei kiba biang bad u Doktor jong kane ka jaka dei peit na Rynjah ba peit ia kane ka jaka bad kaba don kam ka long ban pynkhlian ia ka jingaitika ia ki khynnah ha katei ka thain Nongmynsong kiba khlem ioh ai tika ha ka por COVID-19.
Kumba ka long ka jingai tika ia ki khynnah ha Nongmynsong ka long tang 57% ha baroh katei ka jaka, kane ka jaka sumar kaba don ha Nongmynsong kaba la tip kum ka Wellness Centre ka dei ban peit ruh ban iada ia ki jingpang kiba ia bit.
Ha kane ka jingiakren la ia mir jingmut kumno ban iada na ka jingpang Tb ban lait ka jingiapur sha kaba kham heh da ka jingpynshai paidbah ba ialeh kumno ban pynsngewthuh ia ki briew ba kane ka jingpang Tb kaba lah ban sumar bad pynkoit.
