New Delhi, K.Lyngkot 01: Ka India ka long kaba donbor bha namar baroh ki kam kiba iadei bad ka jingpynmih ia ki jain ki dei kiba don ha ka ri. Ka iew ka long kaba heh bad kaba dang heh kham stet mynta namar ka bai bylla kaba kham jem dor.
Ka jingdon jong baroh ki jingdonkam, ka jingdon lypa ki lad, ka jingbun ki samla ha India, bad ka jingmut jingpyrkhat kaba kiew shaphrang jong kito kiba trei ha kane ka kam, ka jingkyrshan na ka sorkar.
Ka jingkyntiew ia ka teknoloji, ka jingphai khmat ia ka ingsaindur thymmai bad ka jingdon jong ki karkhana ba khlain ban ai jingkyrshan, baroh kine kin iarap ia ka kam pynmih jain ban kiew stet ha kine ki shiphew snem ban wan.
Kiba bun ki ong ba kane ka kam ka dei kaba lah ban wanrah ia ka jingkylla kaba khraw namar ka jingplie lad jong ka ia ki jingkylla. Kadei namar kane ba kane ka kam pynmih jain ka lah ban plie lad ioh kumba 70 tylli ki kam ha ka jingsuh jain bad kumba 30 tylli ki kam baroh ha man ka T.1 klur (USD 132,426) ba la bei tyngka haba ianujor bad 12 tylli ki kam kiba lah ban ioh ha kiwei kiwei ki karkhana.
Lyngba ka jingpynmih kam kaba kot sha ka 105 million ngut ki briew, ka kam pynmih jain ka dei ka nongpynmih kam kaba ar ha ka ri, hadien ka kam rep. Kaba kham kongsan ka long ba ki longkmie ki don ka bynta kaba 70% jong baroh kito kiba trei ha ki kam suh jain bad 73% ha ki kam thain jain.
Ka jingkiew shaphrang jong ka India kum ka jaka pynmih ia ki jain kan shong ha ka jingkhring jong ka iew bad ha ka jingbei tyngka ha ki kor ba bha bad ruh ha ki mar ba thymmai kum ki teknikal textile bad Man Made Fiber (MMF).
Ki jingjop jong ka tnat ki kynthup ia ka jingseng ka India ia ka karkhana shna PPE kaba kot sha ka T. 7000 klur ha ka por kaba duna bha kaba long tang 3 bnai hadien ka jingwan jong ka khlam COVID bad ka jingdon jong ka ri ha ka kyrdan kaba ar ha ki kam shna PPE.
Ka Sorkar ka la ai jingmynjur ban seng 7 tylli ki Pradhan Mantri Mega Integrated Textile Region and Apparel (MITRA) Park ia kaba la mang tyngka haduh T. 4445 klur ha ka 5 snem. Ki PM MITRA Park ki plie lad ban wanrah ia ka Integrated Textiles Value Chain naduh ka jingshna ksai.
Ka jingthain jain, ka jingpynbha / jingai riong bad ka jingshon ia ki dur ha ki jain bad kiwei kiwei ha kawei ka jaka kaban pynduna ia ka inglut jingsep. La thmu ban plie lad ioh haduh 1 lak ki kam pynmih jain bad 2 lak ki kam kiba iadei bad kane ha man ka park.
Ka skhim Production Linked Incentive (PLI) na ka bynta ki kam shna jain ka peit kyrpang ia ka jingpyniar jong ki kam MMF bad ki teknikal textile. Ki jingioh jingmyntoi kiba kot sha ka T. 10,683 klur kin don ha ka 5 snem ba shna ia ki jain MMF ba la ithuh, ki jain MMF bad ki mar kiba iadei bad ki teknikal textile ha India.
Ka skhim Technology Upgradation Fund (TUFS) ka dei ka skhim kaba pyniasoh bad ka jingioh shim ram na ka bynta ka jingpynthymmai bad ka jingkyntiew ia ka teknoloji ha ki kam pynmih jain, ka jingkyntiew ia ka jingsuk ban trei ia ki kam khaii, ka jingplie lad ioh kam bad ka jingkyntiew ia ka jingshalan mar shabar ri.
Ka ATUFS kaba dang iaid mynta ia kaba la mang haduh T 5151 klur ka dei kaba la pyntreikam da kaba peit bniah ia ka jingplie lad bad ka jingai jingkyrshan ia ki MSME.
Ka Samarth ka dei ka prokram pynioh kam kaba thew ia ka jingkyntiew ia ki sap jong ki samla ha ki kam kiba iadei bad ka kam pynmih jain khnang ba kin ioh ia ka lad kamai jakpoh bad ruh khnang ia ka jingkyntiew ia ki sap jong ki nongthain jain bad ki nongshna mar ha ki kam tynrai.
Haduh mynta, 71 tylli ki jaka shna jain, 10 tylli ki jaka kiba iadon kti bad kine ki kam, 13 tylli ki kynhun jong ki sorkar jylla bad 4 tylli ki kynhun kiba iadei bad kine ki kam ki dei kiba la kdup lang hapoh ka skhim ha kaba ka jing thmu ban don 3.45 lak ngut ki nongioh jingmyntoi hadien ba la pyndep ia ki kamram bad hadien ba la ioh jingithuh.
Ka India ka long kaba la khlain lypa ha kaba iadei bad ki jingdon jingem na ka bynta ka jingpynmih ia ki jain. Ka iew jain ha India kaba don ka jingiadei bad ka kolshor bad kaba iar shisha ha ka jingdon ki jain silk ki iarap ia ka ri ba kan don ha ka kyrdan kaba khlain bha ha ki kam ba iadei bad ki jain silk.
Ka India ka wan ha ka kyrdan kaba ar ha ka jingpynmih ia ki jain silk, hadien ka ri China. Ka don ka bynta kaba 32% ha baroh ki kam pynmih jain silk ha ka pyrthei. Ki kam pynmih jain silk ha ka ri ka la kot sha ka T. 75000.00 klur (ba la antad).
Ka Sorkar ka la shim katto katne ki sienjam ban kyntiew ia ka jingbei tyngka, ka jingpynmih, ka jingshalan bad ka jingpynmih lad ioh kam ha ki kam sericulture ha kylleng ka ri. Ka skhim jong ka sorkar Pdeng ka “Silk Samagra” ka pynbiang pisa na ka bynta ka jingwad bniah, ka jingkyrshan teknikal bad ka jingkyrshan pisa ban kyntiew ia ka jingpynmih ia ka jain silk ba bha.
Ka jing thmu kaba nyngkong jong ka skhim ka dei ban pynkylla ia ka India sha ka Atma Nirbhar ha ka jingpynmih ia ka bivoltine silk kaba bha bad ban kyntiew ia ki Automatic Reeling Machine. Ia ka “Indian Silk” la kyntiew lyngba ka jingkyntiew ia ki mar bad ka jingpyniar ia ki jait mar ban pyndap ia ki jingdonkam ha kylleng ka pyrthei.
Ka CCI ka lah ban pynmih kumba 26 lak song hapoh ki kam MSP bad kumba 6 lak ki nongrep cotton ki la ioh jingmyntoi lyngba ka jingpyllait pisa haduh T. 7600 klur sha ki bank account jong ki.
La pyntreikam ia ka skhim Jute-ICARE (Improved Cultivation and Advanced Retting Exercise) na ka bynta ka jingkyntiew ia ka jingbha bad ka jingpynmih ia u sai borni. Ka skhim Jute Raw Material Bank (JRMB) ka dei na ka bynta ka jingpynbiang ia ki mar ba donkam ban pynmih ia u sai borni ha ka dor Mill Gate sha ki kynhun MSME JDP ban pynmih ia ki mar borni bapher bapher.
Ka tnat Textile ka la ai jingmynjur ia ka jingpynbeit bad ka jingbteng ia ka Integrated Wool Development Programme (IWDP) na ka 2021-22 haduh ka 2025-26 ha kaba ka jingmang tyngka ka la kot sha ka T. 126 klur. Ka skhim ‘Wool Processing’ ka dei na ka bynta ka jingkyntiew ia ki kam shna sai wool.
